Të denoncosh kohën me vargje

Ta shikosh kohën me sytë e vargut, e mbi vargje të derdhësh shpirtin,
është vetëm një meritë e poetëve. Por kur mes vargut sulmon dhe veset e
botës, atëherë ke bërë një punë dyfish. Kësaj ja ka arritur poeti
Pëllumb Velo. Libri i ri me fabula “Kunadhja zyrtare” është një tjetër
sukses i autorit, tashmë të sprovuar në këtë fushë. Në vargun e
fabulave të tij nuk ka vetëm muzë dhe krijimtari artistike, por edhe
nerv, shqetësim dhe dhimbje për problemet që kalon vendit. Janë kafshët
që flasin me gjuhën e njerëzve dhe që sjellin modele njerëzish apo
fenomene shoqërore të goditura në shenjë. Fabula është një nga gjinitë
më të vështira. Por Velo ka arritur që me mjeshtëri të bëjë një hop
cilësor nga një njëri vëllim në tjetrin. Me të drejtë mund të themi se
tashmë ai renditet ndër penat më të njohura të fabulave shqiptare të
kohëve të fundit, si Gjikë Kurtiqi, Ferid Lamaj dhe Ferhat Çakërri.
Fabula
të tilla si “Ferra dhe shalqiri”, “Dreri, derri dhe kali”, “Druvari dhe
shkrepësja”, “Dreri dhe palloi”, “Bleta dhe dreri”, janë jo vetëm të
arrira artistikisht, por edhe denoncuese të veseve dhe problemeve
shoqërore. Janë 103 fabula që kanë hyrë në fondin e letërsisë shqipe. E
mes fletëve të librit, që prej disa ditësh është në duar e lexuesit,
janë dhe vlerësimet për krijimtarinë e poetit. Aspak lavde të
pamerituar, penat që kanë marrë përsipër të hedhin impresionet pas
leximit të veprave të Velos, janë plotë sinqeritet. Jo vetëm nga
mjeshtrit e fjalës së shkruar, por edhe nga aktorë dhe njerëz të tjerë
të artit. Aktori Reshat Arbana, pas leximet të fabulave të Velos,
shprehet ndër të tjera, se “Velo ka dituar të shpreh gjithçka që e
shqetëson shqiptarin dhe Shqipërinë në përgjithësi. Ndërsa akademiku
dhe mjeshtëri i gjuhës shqipe, Shaban Demiraj, jep vlerësim për stilin
dhe gjuhën e përdoruar që, sipas tij, është në lartësinë e duhur. “Për
nga të shprehurit, libri ka mjaft pjesë të bukura”.
Por një
element tjetër që e bënë më interesant librin e Pëllumb Velos është dhe
grafika. Nëse Velo ka bërë që kafshët të flasin me fjalë, mjeshtri i
grafikës Kostaq Raka ka arritur të flasë me anë të figurave. Të gjitha
fabulat kanë një ilustrim perfekt që ua shton bukurinë dhe kuptimin,
duke i bërë më të gjalla për lexuesin.
Pëllumb Velo është një emër
që udhëton prej vitesh në viset e poezisë dhe letërsisë. Asgjë nuk
është e rastësishme. Derisa krijimtaria e tij ka arritur në këtë pikë,
i është dashur jo pak mund dhe punë. Velo është autor i nëntë librave
në gjini të ndryshme. “Zëri i nënës më thërret”, poezi; “Kallzuesi i
penduar”, dramë; “Zgjimi”, komedi e vjershëruar; “Jetë në ethe”, roman;
“Mall për vendlindjen”, poezi; “Mos e vrisni dashurinë”, poezi; “Rreth
i kuq”, roman; “Mallkuar dita që linda”, poezi; “Dhelpra dhe Gjahtari”,
fabula dhe botimi i fundit që vjen për lexuesin “Kunadhja zyrtare”.