12 portrete artistësh në Ministrinë e Kulturës Kosovare

12 portrete artistësh në Ministrinë e Kulturës Kosovare 12 portrete të artistëve të njohur kosovarë në ndërtesë të Ministrisë së Kulturës

Tinguj muzike që të rikthenin në të kaluarën, personalitete të jetës politike e kulturore dhe qytetarë të shumtë....kjo qe atmosfera që mbretëroi të shtunën në sheshin “Nënë Tereza”, në kryeqytet, me rastin e prezantimit të 12 fotografive të figurave të rëndësishme të sferave të ndryshme kulturore, por që nuk janë më në mesin tonë.

Portretet e të ndjerëve Ibrahim Rugova, Rexho Mulliqi, Ali Hadri, Muharrem Qena, Musllim Mulliqi, Agim Qavderbasha, Abdurrahman Shala, Melihate Ajeti, Faruk Begolli, Rifat Kukaj, Besim Sahatqiu dhe Abdurrahman Nokshiqi janë të vendosura tashmë në ballë të ndërtesës së Ministrisë se Kulturës. Këtë projekt e ka iniciuar piktorja kosovare, Zake Prelvukaj. Arti nuk fillon këtu, këto personalitete janë rrënjët e kulturës sonë, ka thënë ndër të tjera artistja. Projekti që ka kushtuar 16 mijë euro është financuar nga Ministria e Kulturës. Alberta Troni, zyrtare në Departamentin e Kulturës në këtë ministri, këtë e ka konsideruar një nismë të vogël dhe simbolike. Të pranishëm në këtë eveniment kulturor qenë ndër personalitet më të rëndësishëm të jetës kulturore në vend. Ndër ta bilbili i këngës shqipe, Nexhmije Pagarusha dhe shkrimtari Agim Deva. Ata vlerësuan lart këtë iniciativë të artistes, duke thënë se me këtë ajo do të jetë pjesë e historisë. Prezent qe edhe kryetari i Kuvendit Komunal të Prishtinës, Ismet Beqiri. Ndërsa, nismën e Prevukajt e kanë përshëndetur dhe mirëpritur edhe familjarët e artistëve, fotografitë e të cilëve janë vendosur në këtë ndërtesë. Në vazhdimësi të këtij projekti “masiv”, siç e ka quajtur piktorja Prelvukaj, në muajin mars në pjesën tjetër të Ministrisë së Kulturës do të vendosen edhe 12 fotografi të artistëve të tjerë, përfshirë: Lorenco Antonion, Istref Begollin, Shani Pallasken, Dervish Shaqen dhe të tjerë

» Valle Kosovare - Shpat Kasa