Podolski kërkon frymëzimin e Shumakerit

Në katin e parë të vilës së tij, 30 kilometra larg Mynihut, sulmuesi i Gjermanisë dhe Bajernit, Lukas Podolski, ka ngritur një ambient ku mban kujtimet e tij më të vyera nga sporti. 22�vjeçari (i shpallur Lojtari i Ri më i Mirë në Botërorin 2006) ka shënuar që tani 24 gola për kombëtaren e tij në 45 ndeshje dhe mendohet se do të jetë një prej lojtarëve për t’u vëzhguar në Euro 2008. Në “zyrën” e tij ka, në dollapë prej xhami, objekte si për shembull këpucët me të cilat shënoi tre gola në Botëror, duke ndihmuar Gjermaninë të renditje në vend të tretë. Por “prona” e tij më e çmuar janë një palë këpucë që ndryshojnë dukshëm nga ato të tjerat, pasi firma në to e tradhëton pronarin e mëparshëm të tyre, shtatë�herë kampionin e botës në Formula 1, Mikael Shumaker. “Shumi mi ka bërë dhuratë gjatë sezonit të tij të fundit. Bashkë me xhaketën e pilotit”, thotë me krenari Podolski.

Në këmbim, Shumaker mori një fanellë të Gjermanisë me firmën e Podolskit. Të dy sportistët kanë një marrëdhënie të mirë miqësie, të bazuar te pasioni i përbashkët për futbollin dhe garat me makina. Dhe Podolski shpreson se Shumakeri do të përsërisë vizitën që i bëri skuadrës gjermane para Kupës së Botës 2006 edhe në përgatitjet e Europianit të kësaj vere. Legjenda e makinave i dha një mbështetje të madhe morale skuadrës teksa ajo përgatitej për turneun e para dy viteve dhe Podolski e mban mend mirë atë përvojë. “Ishte vërtet motivuese”, tha ai. “Duhet të marrësh shembull nga një legjendë e sportit si ai. Ajo që ka arritur për Gjermaninë është e pabesueshme”. Gjermania do të qëndrojë gjatë Europianit në qytetin zviceran, Askona, jo fort larg nga shtëpia e Shumakerit në liqenin e Gjenevës. “Nuk do të ketë më kurrë një pilot aq të madh sa ai”, tha Podoslki para se të shtonte duke buzësqeshur: “Ku i dihet? Ndoshta do të më bëjë edhe një xhiro me një makinë garashme dy vende”. Podolski vjen nga Berghaim, në veri të Vestfalisë, dhe shtëpia e familjes së tij është shumë pranë asaj të Shumakerit, në Kerpen. “Shtëpitë e prindërve tanë nuk janë larg, jo më shumë se pesë minuta me makinë... ndoshta më pak për Shumakerin”.

Kur ishte ende fëmijë dhe luante me të rinjtë e Këlnit, Podolski i lutej prindërve të tij gjithmonë që ta çonin me makinë pranë shtëpisë së Shumakerit, me shpresën se mos arrinte t’i hidhte një sy heroit të tij. Por kur u bë profesionist në futboll, realizoi ëndrrën, duke e takuar idhullin e tij. “Në garën e Nyrburgringut, Shumi më ftoi në kabinën e tij personale para nisjes”, kujton Podolski. Dhe kontaktet nuk janë shuar pavarësisht tërheqjes së Shumakerit nga Formula 1 në vitin 2006. Podolski ka numrin e Shumakerit në celular dhe piloti është bërë tifoz me Këlnin për shkak të Podolskit, para se ky të transferohej te Bajerni i Mynihut në verë të vitit 2006. “Që prej kalimit tim në Mynih, nuk jam i sigurt në ai është ende tifoz i imi”, thotë me shaka Podolski.

Sulmuesi i lindur në Poloni çohet edhe në orët e para të mëngjesit për të ndjekur garat me makina dhe është bërë tifoz me pilotin polak, Robert Kubica, të cilin do të donte shumë të takonte. Dhe numri 11 i Bajernit pranon se dëshiron të kthehet sërish në Nyrburgring kur karriera e tij si futbollist të përfundojë, por këtë herë në rolin e pilotit. “E kam ëndërr të ngas një herë një makinë të Formula 1”, tha ai. “Do të doja ta bëja këtë kur karriera ime të përfundojë pas dhjetë apo 12 vjetësh”. Podolski momentalisht është pa patentë � dhe makina e tij Audi Q7 është e sekuestruar nga policia � pasi është dënuar për ngarje të rrezikshme makine në qershor të vitit 2007. Por do të donte shumë të merrte mësime para se të shkelte pedalin e gazit në një makinë aq të shpejtë. “Ka aq shumë butona të mallkuar dhe marshe... por pak stërvitje do të më bënte më optimist për ta ngarë një makinë të tillë”.