Kapelo: Bekami do të luajë!

Trajneri i Anglisë, Fabio Kapelo, konfirmoi që David Bekam do të zhvillojë ndeshjen e tij të 100 me kombëtaren sot në Paris, përballë Francës. Trajneri italian, i cili grumbulloi ish�kapitenin për herë të parë pas mospërfshirjes në ndeshjen e debutimit të tij konfirmoi prezencën e Bekamit në një intervistë për “Sky Sports”. “Duhet të vendos ende se cilët lojtarë do të luajnë, por kam marrë një vendim”, deklaroi Kapelo. “Bekami do të luajë të paktën disa minuta. Nuk mund ta detyroj të vijë këtu që prej SHBA�së për të luajtur një miqësore dhe më pas ta kthej mbrapsht pa e përdorur. E njoh mirë Davidin dhe e di që mund të bëjë ndryshimin në këtë skuadër në disa drejtime. E di se çfarë mund t’i ofrojë ai skuadrës. Përsa i përket të ardhmes, le të presim dhe të shohim. Askush nuk e di se çfarë rezervon ajo”. Kapelo shtoi: “Mendoj se çdo futbollist në botë ëndërron të luajë 100 ndeshje me kombëtaren e tij, por janë shumë të paktë ata që ia dalin mbanë dhe Bekami duhet përgëzuar me të vërtetë shumë për këtë arritje”.

Përsa i përket çështjes së kapitenit, midis Territ, Bekamit dhe Xherardit fitues doli... Rio Ferdinand. Trajneri italian konfirmoi në konferencën për shtyp se do të jetë qendërmbrojtësi i Mançesterit, i cili numëron 65 paraqitje me “luanët”, ai që do të mbajë mbi krah shiritin e kapitenit. “Nga ajo që kam parë gjatë këtyre ditëve të stërvitjeve, ai ka punuar me dëshira, ka treguar se ka personalitet dhe ndikim në dhomën e zhveshjes. Kam parë disa ndeshje të Rios tek Mançesteri dhe ai është pa dyshim një profesionist shumë i mirë. Unë do të provoj disa kapitenë deri sa të fillojnë ndeshjet kualifikuese për në Botëror, pasi dua të shoh midis disa futbollistëve se cili është më i miri”. Kapelo konfirmoi se do të provojë të paktën edhe dy kapitenë të tjerë përpara se të vendosë se cili do të jetë përfundimisht kapiteni i “luanëve”. Ishte mesfushori i Liverpulit, Stiven Xherard, ai që mbajti shiritin në krah në ndeshjen e debutimit të italianit ndaj zvicrës. Fabio tregoi se nuk ia kishte shpjeguar vendimin e tij kapitenit të Çelsit, Xhon Territ. “Nuk kam ndërmend t’i shpjegoj askujt zgjedhjet e mia. Unë bëj zgjedhjet që mendoj si më të favorshme duke arsyetur mbi faktet”. Majkëll Ouen u la në stol kundër Zvicrës dhe Kapelo nuk shpjegoi nëse sulmuesit të Njukasëllit do t’i jepet një shans për të treguar vlerat e tij në Paris. “Të gjithë futbollistët janë të rëndësishëm, por kush do të luajë varet edhe prej cilësive të kundërshtarit dhe asaj që ke ndërmend të kërkosh prej skuadrës. Për momentin jemi ende duke eksperimentuar, duke parë se si mund të luajë skuadra në disa mënyra të ndryshme, deri sa të qartësoj një mënyrë që do të më duket më efektshmja. Në skuadrat e mia nuk ka patur asnjëherë futbollistë titullarë dhe stoli, prandaj shanset e të gjithëve do të varen prej asaj që ata vetë do të ofrojnë për kombëtaren”.