Roma përgatitet për “odisenë”

Kanë besuar gjithmonë dhe do të vazhdojnë ta bëjnë këtë, sidoqoftë, edhe nëse do të ketë gabime të tjera, edhe nëse do të vijnë humbje, edhe nëse rendimenti i disa lojtarëve vendimtarë do të jetë i “lëkundur”. Për Romën javët në vazhdim do të jenë një “odise” e vërtetë, pavarësisht se entuziazmi i jashtëzakonshëm, optimizmi për të ardhmen dhe vetëdija në forcën e një grupi solid do të jenë “doza e adrenalinës” për verdhekuqtë. Daniele de Rosi, një stakanovist i vërtetë, i palodhur, edhe kur dëmtimet apo gjendja e tij nuk është nga më të mirat, ka krijuar një ide të tijën, për formën aktuale të skuadrës: “Ndoshta askush nuk e ka vënë re se jemi konkurrues në të gjitha kompeticionet, por ja që kështu flasin të dhënat: klasifikimi në kampionat, kualifikimi në çerekfinalen e Champions League dhe në gjysmëfinalen e Kupës së Italisë. Mendoj se më shumë se kaq nuk mund t’i kërkohet një ekipi që është konsideruar gjithmonë si i katërti mes Juventusit, Milanit dhe Interit, por që me kalimin e viteve është rritur dhe ka krijuar një grup cilësor, për të mos harruar edhe meritat e trajnerit. Ne jemi gati për të luftuar në çdo front, do të na duhet vetëm pak fat, sepse në futboll është i rëndësishëm edhe ai, për të arritur triumfe”, tha mesfushori verdhekuq, kampion bote me Kombëtaren “axurre”. I këtij mendimi është edhe Simone Perrota, i cili është i sigurt për diçka: “Nëse nuk vjen titulli, do të vijë Champions dhe, pse jo, Kupa e Italisë, edhe pse nuk shihet si një trofe prestigjoz”. Në fund, kapiteni Françesko Toti, “ikona” e vërtetë e Romës, por që ka probleme dëmtimi: “Kam disa javë q` shtrëngoj dhëmbët dhe po sakrifikoj, por jo sepse kështu më detyron klubi, por sepse kështu jam i gatuar. Të gjithë bashkë mund të fitojmë diçka të rëndësishme”.

Sensi: Fitorja e Juves na riktheu besimin