Del Piero: Ndihem krenar, sepse kam arritur majën!

“Kam mbërritur majën dhe për këtë jam shumë krenar”. Alesandro del Piero, 552 ndeshje me Juventusin, ka arritur të barazohet me një tjetër rekord dhe shumë shpejt do ta kalojë. Kapiteni bardhezi është futur në librin historik të “Zonjës së Vjetër”, duke iu bashkangjitur një figure të njohur dhe një legjende të futbollit italian dhe atij të Juventusit, Gaetano Shireas. Një rekord i arritur me Interin dhe i festuar në mënyrën më të mirë, me një fitore të rëndësishme në “San Siro”. Dje, në adresën e tij zyrtare, Aleks ka thënë: “552 ndeshje, me të njëjtën fanellë. Numrat përmbledhin kujtimet e mia. Tregojnë për fitoret dhe, për fatin e keq, edhe humbjet. Shumë përqafime, lot, ndonjëherë ngushëllime, eufori, vuajtje, mërzi, tërbim, gëzim dhe krenari. Pasionin tim, gjithmonë, që nga dita kur preka topin për herë të parë. Pra, pjesën më të madhe të jetës time. Kam zhvilluar plot 552 ndeshje me të njëjtën fanellë. Numrat për mua kanë një domethënie të madhe, të gjitha arritjet dhe rekordet që kam mundur të shijoj në këtë fazë të karrierës. Por, këto nuk janë gjithçka. Sepse kam menduar gjithmonë se nuk mjafton vetëm t’i arrijmë triumfet e mëdha. Vlera varet edhe për nga mënyra se si ato arrihen. Pra, kam mbërritur në majë, në historinë e Juventusit me Gaetano Shirean. Ja për çfarë e kam fjalën kur them se ka të bëjë shumë emri, ashtusi Gaetano Shirea. Ndonjëherë, pyes veten si më shohin të rinjtë, fëmijët dhe mendoj se do të ishte më mirë të më shihnin ashtu si unë shihja një legjendë si Shirea. Flas për një njeri, jo vetëm për një futbollist të jashtëzakonshëm. Sepse kjo, për mua, do të thotë që të futesh në zemrën e njerëzve, të lejosh që diçka të kalojë përtej numrave. Kam zhvilluar 552 ndeshje me të njëjtën fanellë dhe nuk jam i lodhur, përkundrazi, kam arritur majën, por shoh të ardhmen, shoh përpara, sepse e rëndësishme është që të mos lodhesh asnjëherë me atë që ke arritur, por të synosh për më shumë, të gdhendësh në librin e historisë triumfe të tjera, me të njëjtën fanellë, atë që më ka bërë të dashurohem pas një emri, Juventusi.