UBT nënshkroi marrëveshje bashkëpunimi me Institutin Diplomatik të Bullgarisë pranë MPJB-së

Në vazhdën e
zgjerimit të bashkëpunimit me institucione prestigjioze ndërkombëtare
dhe rajonale, Universiteti për Biznes dhe Teknologji (UBT),
përkatësisht Fakulteti për drejtësi, shkenca politike dhe diplomaci ka
nënshkruar dje edhe një marrëveshje bashkëpunimi në fushën e
marrëdhënieve ndërkombëtare dhe diplomacisë. Kështu dje, në ambientet e
UBT-së, rektori i UBT-së, dr. Edmond Hajrizi ka nënshkruar marrëveshje
bashkëpunimi me Prof.dr. Milan Ivanov, drejtor i Institutit Diplomatik
të Bullgarisë pranë Ministrisë së Punëve të Jashtme Bullgare. Në
një ceremoni ku ishte i pranishëm edhe shefi i Zyrës Bullgare në
Kosovë, Nikolaj Koleva dhe përfaqësues të stafit akademik të UBT-së,
dr.Edmond Hajrizi ka folur për historikun e UBT-së dhe programet që
ofron UBT-ja për studime ne të gjitha fushat me theks të veçantë në
fushën e diplomacisë, integrimeve evropiane dhe marrëdhënieve
ndërkombëtare. Ndër të tjera rektori Hajrizi theksoi se qëllimi i
UBT-së është ofrimi i programeve të përparuara në
bashkëpunim me partnerët ndërkombëtarë. Për mëtutje rektori Hajrizi
përmendi një varg institucionesh prestigjioze ndërkombëtare me të cilat
bashkëpunon UBT, siç bie fjala: Akademinë Diplomatike të Vjenës, ENA
(Shkolla e Administratës Publike në Paris) si dhe eksperiencat që studentët e UBT-së marrin në institucionet partnere në Evropë e në SHBA. Ndërsa,
prof. Milan Ivanov, ka paraqitur në takim të dhëna për punën e
Institutit Diplomatik të Bullgarisë, duke theksuar se ata kanë
organizuar studime dhe trajnime të ndryshme për studentë dhe diplomatë
nga vende të ndryshme të botës.Ai po kështu theksoi se institucioni që
drejton ka bashkëpunim me shumë institucione dhe universitete
prestigjioze ndërkombëtare. Prof.
Ivanov përkujtoi gjithashtu se Instituti Diplomatik i Bullgarisë
bashkëpunon me figura të shquara dhe personalitete e burrështetas të
politikës, shumë punime të të cilëve janë të përfshira në publikimet e
kësaj akademie. Përfundimisht
palët u pajtuan që të vazhdojnë me implementimin e menjëhershëm në
praktikë të projekteve të tyre të përbashkëta që kanë të bëjnë me
trajnimet, hulumtimet dhe studimet në fushën e Diplomacisë, Integrimeve
Evropiane dhe Marrëdhënieve Ndërkombëtare. Kjo dëshmon edhe njëherë për
njohjen ndërkombëtare të kualitetit dhe studimeve ndërkombëtare që
ofrohen në UBT.