LAZIO-INTER, NDESHJA KRYESORE E JAVËS SË 31-të NË SERIE A

Kryendeshja e javës së 31 e kampionatit italian Serie A do të zhvillohet të shtunën mbrëma me fillim nga ora 20.30 minuta në stadiumin Olimpik në Romë ndërmjet Lazios dhe liderit Inter. Lazio mund t'i bëjë nder rivalit të qytetit Romës që i shkon Cagliarit, por vetëm nëse mposht neroaxurët, të cilët kohëve të fundit po ballafaqohen me krizë. Edhe pse ekipi mjekësor i kampionit aktual i ka bërë me dije Roberto Mancini-t që suedezi Zlatan Ibrahimovic është i lënduar dhe ndien dhimbje, duket se ish-anëtari i Ajax-it dhe Juventus-it do të sakrifikohet për ballafaqimin tejet të rëndësishëm në luftë për Skudeto. Do të rrezikohet me të ngase epërsia e pikëve ndaj Romës nuk është e madhe, vetëm 4. Mungesat në radhët e Inter-it janë të konsiderueshme. Esteban Cambiasso, Olivier Dacourt, Walter Samuel dhe Ivan Ramiro Cordoba janë të lënduar, Julio Ricardo Cruz është i suspenduar dhe në rast të mos angazhimit të Ibrahimovic-it pa dyshim që sulmi do të përbëhet nga Crespo dhe Suazo të cilët sapo janë kthyer nga detyra ndërkombëtare me përfaqësueset e tyre. Në radhët e Lazio-s as këtë javë nuk do të kthehen Luciano Zauri dhe Mobido Diakhite të lënduar një kohë të gjatë, ndërsa Massimo Mutarelli është i suspenduar. Valon Behrami pritet të startojë prej fillimit. Ndeshjen Lazio-Inter mund ta ndiqni direkt në Kohavision. Takimin e dytë të cilin Kohavisioni do ta transmetojë këtë javë është ai që do të zhvillohet në Olimpiko të Torinos, ku do të ndeshen Juventus dhe Parma. Ndeshja e fundit në Torino e zhvilluar në edicionin 2005-06 pat përfunduar baras 1:1, ashtu si edhe ajo e pjesës së parë të kampionatit por me rezultat 2:2. Zonja e vjetër e cila është trimëruar pas fitores së madhe në Meazza kundër Inter-it pritet të jetë e kompletuar me rikthimin e Christiano Zanetti-t në mesfushë. Në anën tjetër menaxheri i Parmës argjentinasi Hector rul Cuper nuk mund të llogarisë në sulmuesin Christiano Lucarelli, i cili është i suspenduar. Ndeshjen Juventus-Parma mund ta ndiqni direkt në Kohavision të dielën me fillim nga ora 15.00 kur startojnë edhe këto sfida: Catania-Torino, Empoli-Sampdoria, Genoa-Reggina, Livorno-Sien