Krespo: Kriza është “arkivuar”!

Sipas sulmuesit 32?vjeçar, Hernan Krespos, “më e keqja ka kaluar”. Dhe kur e thotë një njeri i cili e ka shpëtuar Interin në dy raste nga humbja, duhet besuar. Krespo ka shënuar katër gola në kampionat, dy të fundit kundër Lacios dhe Sampdorias, ekipe të cilat kanë ndaluar ecurinë pozitive të zikaltërve. Kur duhen edhe shtatë javë në përfundimin e kampionatit, ku Interi ka marrë vetëm dy pikë në tre ndeshje, argjentinasi shpjegon, se duhet të vazhdojnë të luajnë ashtu siç kanë bërë gjatë pjesës më të madhe të kampionatit. “Eshtë si tek çiklistat, duhet të shikojmë përpara sepse po të shikojmë pas do të na kalojnë”, tha sulmuesi i Interit në një intervistë.

Pas Liverpulit ? “Fatkeqësisht jemi duke kaluar një periudhë shumë delikate, fakti që dolëm jashtë Championsit na ka dhënë një shkundje, por tani ndeshje pas ndeshje, kemi kohë për t’u rikthyer në Interin që fitonte gjithmonë”. Mbase edhe tek Krespo që shënonte shumë, apo po fillon të ndihet mosha? “Mosha jo, nuk kam filluar ende të shikoj njerëz që vrapojnë më shpejt se unë”. Por, këtë vit për të ka patur pak gola dhe shumë pankinë. “E vërtetë që kam luajtur më pak se sa kam dëshiruar, por kjo është një gjë normale. Vitin e kaluar trajneri më zgjodhi më shumë dhe sivjet ai më ka zgjedhur më pak, por kjo është normale”.

Roma, të shohë krahët ? “Ka shumë mundësi dhe është e qartë se nuk jemi më shumë të qartë përpara portës si disa kohë më parë, por kjo i ndodh të gjithave ekipeve”. Nga të gjithë ekipet, kundërshtari numër një është po ai. “Roma, ajo që po na qëndron shumë afër. Por Roma ka shumë kundërshtarë, ata duhet të kenë kujdes edhe nga pas. Ndërsa sa për ne duhet të mendojmë vetëm për veten tonë. Duhet të vazhdojmë të punojmë, dhe duhet t’i kthehemi rrugës së fitoreve”.