Venger: Gjyqtari na dënoi

Arsen Venger ende nuk di të shpjegojë se ai Arsenali nuk arriti të fitonte çerekfinalen e parë në fushën e tij ndaj Liverpulit, por ai ka besim se djemtë e tij do ta përfundojnë detyrën me sukses javën e ardhshme në “anfield Road”. Topçinjtë, që tani janë larg titullit në Angli, pas vetëm një fitoreje në gjashtë takimet e fundit, morën kryesimin me anë të Emanuel Adebajorit. Por Të Kuqtë, finalistët e sezonit të kaluar, barazuan shpejt me anë të Dirk Kajtit, që shtyu topin në rrjetë pas një aksioni fantastik të kapitenit Stiven Xherard. Arsenali dominoi në pjesën e dytë, teksa mbrojtja zmbrapsi çdo sulm të vakët të Liverpulit dhe vendasve iu mohua një penallti kur Aleksander Hleb u pengua qartësisht në zonë nga Kajt, por vetë gjyqtari holandez Piter Vink e injoroi situatën. Djemtë e Vengerit nuk gjetën mënyrën për ta kaluar Liverpulin, që tani duket se ka më shumë shanse për të shkuar në gjysmëfinale, falë golit të shënuar në fushën kundërshtare. “Eshtë e vështirë të kuptosh se si nuk e fituam këtë ndeshje, sepse patëm shumë zotërim topi dhe shanse për të shënuar”, tha Venger. “Por ishim edhe pak të pafat me vendimin e gjyqtarit, që nuk na akordoi një penallti. Ky barazim është pak i vështirë për t’u pranuar, por tani duhet të vazhdojmë më tej. Ndonjëherë gjyqtari është në një pozicion të keq, por dje ai ishte vetëm 4 metra larg Kajtit, dhe ajo ishte një penallti e pastër”.

Më të mirët? Vengeri nuk ka dyshime për faktin se Arsenali ishte skuadra më e mirë në fushë. “Mendoj se nuk u shpërblyem për atë që prodhuam, pasi kishim shanse për të fituar”, vazhdoi francezi. “Liverpuli krijoi shumë pak dhe e gjithë pjesa e dytë u luajt në gjysëmfushën e tyre. Nëse sheh zotërimin tonë të topit në krahasim me Liverpulin, është e tmerrshme që nuk shkuam dot më shumë se një 1?1. Tani ndeshja e dytë do të jetë një provë e vështirë për ne, por ne kemi të gjithë dëshirën për t’ia dalë mbanë. Por para asaj ndeshjeje, kemi një tjetër në kampionat dhe ajo mund të na dëmtojë më shumë se ndeshjet e Champions. Tani është një luftë mbijetese, ekipi që është më mirë pas këtyre tre ndeshjeve do të jetë ekipi më i mirë, pasi të shtunën luajmë në Premiership me Liverpulin”.

Van Persi ? Vengeri rrëfeu se Robin van Persi është në dyshim për duelin e së shtunës, pasi u zëvendësua nga Teo Uollkot në pushim për shkak të një problemi muskular. “U detyruam ta ndërronim për të qenë të kujdesshëm”, përfundoi trajneri i Arsenalit. “Ai nuk duket shumë keq, por mendojmë se nuk do të luajë dot në ndeshjen tjetër. Por nëse do të luante në formën e tij maksimale të martën në “Anfield Road” për ne do të ishte një ljm shumë i mirë”.