Drogba i bindur: Kalojmë ne!

Didier Drogba këmbëngul se Çelsi do të kualifikohet për në gjysmëfinalet e Champions League pavarësisht humbjes shokuese në Stamboll të mërkurën në mbrëmje. Blutë u mundën 2?1 nga Fenerbahçe e Zikos dhe tani duhet të bëjnë një sforco më shumë për të përmbysur rezultatin, pavarësisht se të martën do të luhet në “Stamford Bridge” dhe jo në “ferrin” turk. Drogba ka besim se skuadra e tij mund të përmbysë gjithçka. “Eshtë një rezultat shumë zhgënjyes, por kam shumë besim se mund të kalojmë për në fazën tjetër. Nuk ishte mirë që humbëm atje, kështu që do të duam të punojmë edhe më shumë gjatë këtyre ditëve, për të parë se çfarë bëmë gabim ndaj Fenerbahçes”.

Drogba ishte një prej atyre që ka punë për të bërë, pasi shënjestra e tij nuk ishte në ditë të mirë, por sulmuesi nga Bregu i Fildishtë e sheh me optimizëm takimin e kthimit edhe për veten. “Eshtë e vërtetë që edhe unë gabova, por ne humbim të gjithë, ashtu sikur fitojmë të gjithë. Fenerbahçe ka bërë një punë mjaft të mirë deri tani, sepse ka ditur të shfrytëzojë faktorin fushë, por nuk ka ardhur ende në “Stamford Brdige”. Edhe tifozët tanë mund të krijojnë një atmosferë të ngjashme dhe ne duhet ta shfrytëzojmë më së miri”.