Me 6 fitore jemi kampionë!”

Fabregas: “E di që nuk jemi më skuadra më e favorizuar por e kemi vetëm ne në dorë për të fituar ndeshjet e mbetura”



Fransesk Fabregas është i mendimit se Arsenali ka ende shanse të mira për të fituar titullin kampion, por nuk duhet të shpërdorojë asnjë rast. Duke filluar që nga ndeshja e sotme me Liverpulin. Mes “Topçinjve” dhe të kuqve do të luhet ndeshja e dytë e serisë prej tri të tillash brenda një jave, por nëse në Europë të dy skuadrat pretendojnë, për titullin në Angli, vetëm Arsenali mbetet ende në garë. Dhe Fabregas është i bindur që skuadrës së tij i është rikthyer besimi pas disa javësh të vështira. “E dinim që fitorja me Boltonin ishte shumë e rëndësishme, sepse mundëm të qëndronim sërish në garën për titull”, tha spanjolli. “Besimi është i rëndësishëm për çdo skuadër në botë. Edhe nëse luan mirë, duhet të arrish rezultate që të mund të qëndrosh në garë. Tani kanë mbetur edhe pak ndeshje dhe duhet të japim një shtysë të fundit për të fituar kampionatin. Duhet të përqendrohemi për të fituar çdo ndeshje nga tani deri në fund, në mënyrë që të kemi një mundësi. E di që nuk jemi më skuadra më e favorizuar por e kemi vetëm ne në dorë për të fituar gjashtë ndeshjet e mbetura”.