Alfonso Alves "frenon" Mançesterin

Alfonso Alves shënoi për të parën herë për Midëllsbroun, pikërisht në ndeshjen kundër Mançester Junajtidit që, për shkak të barazimit të djeshëm 2‑2 në "Riversajd" i dha Çelsit arsye për të festuar. Blerja rekord e klubit Alves shënoi në secilën prej dy pjesëve të lojës për Boron, që mund të kishte arritur një fitore historike, sikur Uejn Runi të mos kishte barazuar në minutën e 74‑t. "Djajtë e kuq" e nisën si zakonisht ndeshjen e karakterizuar nga dëbora, kur pas dhjetë minutash lojë Kristiano Ronaldo shënoi golin e tij të 37‑të sezonal nga pranë portës. Megjithatë, Boro tregoi qartësi në veprimet sulmuese dhe në minutën e 35‑të barazoi me Alves, që çau në mesin e mbrojtjes kundërshtare dhe mposhti me gjuajtjen e tij portierin Edvin van der Sar. Vendasit kaluan më pas në epërsi dhjetë minuta pas fillimit të pjesës së dytë, kur sërish Alves i shpëtoi mbrojtjes së Junajtidit për ta dërguar topin në rrjetë. Cilësitë luftarake të djemve të Fergusonit dolën në pah në 20 minutat e fundit, kur edhe u shpërblyen me golin e barazimit. Topi i goditur nga Runi thjesht sa u prek nga portieri Shvarcer. Tashmë kryesuesit e Premiershipit janë tri pikë larg "bluve" të Londrës, që janë edhe ndjekësit më të afërt. Takimi rezultoi shumë argëtues për mijëra tifozët që, për të parën herë këtë sezon e kishin mbushur thuajse tërë stadiumin dhe mundën të festonin në fund të ndeshjes me heroin e tyre Alfonso Alves.

GAFA - Rastin e parë për shënim e pati Majkëll Kerrik i Junajtidit, që mori një top në cepin e zonës dhe pasoi për Ronaldon, i cili u zbulua nga mbuluesi i tij dhe e goditi portën, duke e zhbllokuar rezultatin në favor të Mançesterit. Më pas Alves dha sinjalet e para, duke goditur bukur me kokë. Pastaj ishte radha e Rajan Gigsit që gjeti vetëm pjesën e jashtme të rrjetës. Xheremi Aliadier ishte fajtor për një gafë të pafalshme, sepse francezi gjuajti jashtë nga një pozicion tepër i favorshëm. Vëmendjen e tërhoqi portugezi Ronaldo, i cili shpërtheu me topin në këmbë, por gjuajtja e tij nuk ishte e saktë dhe përfundoi jashtë. Alves fitoi më pas një goditje të lirë jashtë zone. Ekzekutimi ishte shumë i mirë, por topi u ndal nga duart e Van Der Sarit, që priti edhe gjuajtjen e mëpasshme të Emanuel Pogatecit. Megjithatë, 10 minuta para fundit të pjesës së parë braziliani barazoi në mënyrë të shkëlqyer. Pasimi i gjatë i O'Nillit nga e djathta e gjeti të papërgatitur Junajtidin, ndërsa Aliadier devijoi me kokë drejt e në këmbët e Alvesit, që me gjakftohtësi mposhti portierin Van Der Sar me të majtën. Ronaldo u tërbua më pas, kur një gjuajtje e tij u duk e ndalur nga krahu i Endrju Tejlorit, por arbitri Majk Rili dha vetëm goditje këndi.

KENAQESIA - Goli i pësuar nga Alves ishte i pari i pësuar nga Junajtidi që prej 23 shkurtit, prandaj tifozët vendas u çmendën nga kënaqësia. Dhjetë minuta pas fillimit të pjesës së dytë, sërish Aliadier pasoi me kokë për Alvesin, që këtë herë shënoi me të djathtën. "Djajtë e kuq" u dukën të tronditur dhe braziliani mund të kishte shënuar golin e tretë, por goditja e tij me kokë u ndal nga gjuri i Rio Ferdinandit. Runi, që dukej sikur do të shpërthente nga marazi, e gjeti më në fund rrugën e daljes nga tuneli, kur zëvendësuesi Park Ji‑Sung mposhti Tejlorin dhe pasoi për sulmuesin e Anglisë, që shënoi nga pranë portës. Dhjetë minuta para fundit, Tunkai zuri vendin e Alfonso Alvesit, që mori duartrokitjet e tërë stadium