Vendi i dytë e kënaq Slomkën

Trajneri i Shalkes, Mirko Slomka, ishte shumë i gëzuar pasi skuadra e tij përfitoi nga rrëshqitja e radhës e Hamburgut, për t'u ngjitur në vendin e dytë të renditjes së Bundesligës. Të shtunën nisi edhe një betejë shtatëshe për dy vendet, që japin të drejtën e pjesëmarrjes në Ligën e ardhshme të Kampionëve, meqenëse Hamburgu u mposht 1‑0 në Shtutgart, duke ia lehtësuar punën Bajernit kryesues. Shalke fitoi minimalisht kundër Hansës së Rostokut dhe përfitoi nga kjo dhuratë e papritur, duke u renditur menjëherë pas bavarezëve, që në pamje të parë duken të pakapshëm. Prapëseprapë, një betejë e fortë për vendin e dytë dhe të tretë ka nisur të zhvillohet, falë fitoreve të arritura nga Shtutgarti, Volfsburgu dhe Verder Bremeni. Vetëm gjashtë pikë e ndajnë Shalken nga Ajntrahti i Frankfurtit në vendin e tetë. Të gjitha këto skuadra do të luftojnë për katër vende në kupat e Europës sezonin tjetër.

"Jam shumë i kënaqur që zumë vendin e dytë të renditjes, sepse ishte pikësynimi ynë që të përfitonim nga gabimet e kundërshtarëve tanë," tha Slomka. Trajneri i Hamburgut, Hub Stivens, e priti mirë humbjen e skuadrës së tij, duke thënë se "parapëlqej të humbas një ndeshje dhe të fitoj ndeshjen pasardhëse, sepse kështu fitojmë tri pikë, gjë që nuk mund ta bëjmë nëse barazojmë dy takime radhazi, pasi kështu merr vetëm dy pikë. Gjithçka që ka rëndësi është renditja në fund të 34 javëve të kampionatit." Trajneri i Volfsburgut, Feliks Magat, ishte i të njëjtit mendim me kolegun Stivens dhe u përpoq ta hiqte trysninë nga skuadra e tij, duke mos i vënë asaj objektiva të caktuara, pavarësisht ngjitjes në vendin e shtatë të renditjes, falë rezultateve më të mira të arritura nga një skuadër e Bundesligës për vitin 2008. "Ne nuk mund të fillojmë përllogaritjet, por duhet të shikojmë se çfarë mund të përfitojmë në fund të sezonit, - tha dy herë kampioni i Gjermanisë me Bajernin e Mynihut. - Ne duhet të punojmë për çdo ndeshje dhe pastaj të shikojmë rezultatet e kësaj pune.