Venger nuk dorëzohet nga gara për titull

Arsen Venger nuk pranon të dorëzohet në luftën për titullin kampion të Premier Ligës, edhe pse barazimi 1‑1 përballë Liverpulit është shumë i kushtueshëm. "Topçinjtë" renditen tashmë gjashtë pikë prapa kryesuesve të Mançester Junajtidit dhe mundësitë e tyre për të fituar titullin e parë kampion, që prej vitit 2004, janë tepër të pakta. Mirë që Niklas Bendtner arriti të barazonte golin e shënuar më parë nga Piter Krouç, sepse Arsenali edhe mund të kishte humbur.

Shpresat e Vengerit për të fituar diçka këtë sezon janë dukshëm më të mëdha në Europë, edhe pse Liverpuli duket të ketë epërsi psikologjike, në kuadër të çerekfinales së dytë të Ligës së Kampionëve, të martën mbrëma në "Anfilld". Prapëseprapë, në publik francezi Venger nuk e humb toruan dhe ngul këmbë se nuk do të dorëzohet derisa këtë ta thotë matematika. "Unë nuk e di nëse ky ishte fundi i garës sonë për titull, sepse varet edhe nga rezultatet e skuadrave të tjera, - u shpreh ai. - E kam thënë më parë se na duheshin, të paktën pesë fitore dhe një barazim. Në mendjen time nuk ka përfunduar asgjë, sepse matematikisht është kështu."

Rafael Benitez i Liverpulit nuk ndan të njëjtin optimizëm me Vengerin. "Unë mendoj se për ta do të jetë shumë e vështirë tani, -sugjeroi ai. - Ai e di shumë mirë se, kur je në garë për titullin kampion nuk mund të humbasësh pikë në fazën përmbyllëse të kampionatit, prandaj është vërtet e vështirë. Ndoshta mundësia e tyre e vetme për trofe këtë sezon mbetet Liga e Kampionëve, gjë që do të thotë se ata do të jenë edhe më të rrezikshëm për ne." Spanjolli kishte më tepër të drejtë të ndihej i kënaqur me punën e tij të shtunën pasdite, sepse kurseu shumicën e lojtarëve të tij kryesorë, si Zherard e Torres, për të martën në Champions, dhe rrëmbeu një pikë të vlefshme në luftën për të mbajtur vendin e katërt të renditjes. Venger kishte lënë gjithashtu pushim disa prej lojtarëve të tij kryesorë, përfshi edhe Adebajorin.

Arsenali nuk arriti ta gjente rrjedhshmërinë e lojës së tij dhe vetëm dy fitore në 10 ndeshje nuk mund të jenë përgatitja ideale për ndeshjen më të rëndësishme të sezonit, edhe pse trajneri francez ishte në ankth për t'ia larguar trysninë skuadrës së tij të re në moshë. "Sigurisht që është një ndeshje që i ka të gjitha rezultatet. Bëhet fjalë për një çerekfinale kthimi në Ligën e Kampionëve. Nuk ka si të jetë ndryshe, - tregoi Venger, - por mua nuk më pëlqejnë deklaratat bombastike. Do të luajmë ndeshjen tonë të martën dhe do të përpiqemi të fitojmë, duke dhënë absolutisht maksimumin. Sido që të jetë, sezoni ynë nuk ka qenë i dështuar, sepse në fillim të vitit njerëzit prisnin të përfundonim midis vendit të 10‑të dhe të 12‑të, prandaj e kemi tejkaluar pritshmërinë e tyre. Megjithatë, është e vërtetë se të martën duhet ta marrim veten nga zhgënjimet e kohëve të fundit, duke e ditur se kishim mundësi ta fitonim edhe ndeshjen e së shtunës." Ndërkaq, Benitezi mendon edhe për perspektivën nervoze të gjuajtjeve nga pika e bardhë, edhe pse Liverpuli i tij ka epërsinë e golit të shënuar në fushën kundërshtare. "Ne kemi lojtarë të mirë që gjuajnë penalltitë, prandaj nuk besoj se do të na duhet të bëjmë shumë stërvitje në këtë aspekt, - tha spanjolli. - Nuk bëhet fjalë vetëm për cilësi, sepse lojtarët e mirë kanë edhe gjakftohtësinë në anën e tyre, si dhe e dinë se çfarë duhet bërë. Ama, ne duhet të përpiqemi që të shfrytëzojmë përvojën tonë gjatë ecurisë së takimit, por shpresoj që të mos arrijë deri te penalltitë,"