Bajerni "prek" titullin në Bundesligë

Ylli i Francës, Frank Riberi, shndërroi me gjakftohtësi në gol një penallti në pjesën e dytë, duke e ndihmuar Bajernin me dhjetë lojtarë që të fitonte 3‑1 kundër Bohumit pasditen e djeshme. Në këtë mënyrë, gjigantët e futbollit gjerman e çuan në nëntë pikë diferencën në renditje nga vendi i dytë. Kur mbeten edhe shtatë ndeshje për t'u luajtur, Bajerni i Mynihut është fare pranë sigurimit të titullit të 21‑të kampion në Bundesligë, edhe pse djemtë e Otmar Hicfeldit u detyruan dje që ta përmbysnin rezultatin për të fituar. Golat e mbrojtësit Lusio, mesfushorit Riberi dhe mbrojtësit Kristian Lel e vulosën fitoren.

Në minutën e 4‑t Bajerni mbeti me gojë hapur, kur mesfushori i talentuar i Bohumit, Mimun Azauag, mposhti portierin veteran Oliver Kahn, me një goditje fantastike nga cepi i zonës së rreptësisë, që përfundoi në trekëndëshin e majtë të portës bavareze. Më pas, Bajerni shkoi nga shiu në breshër, sepse mesfushori Mark van Bomel u përjashtua me karton të kuq, pas vetëm 25 minutash lojë, kur ndërhyrja e tij e pakuptimtë u ndëshkua me kartonin e dytë të verdhë. Megjithatë, në minutën e 31‑të rekordmenët e Gjermanisë u kundërpërgjigjën me mbrojtësin Lusio, që devijoi me kokë në rrjetë goditjen e lirë të Bastian Shvajnshtajgerit. Për të harruar paraqitjen e shëmtuar të së enjtes, kur pësuan një gol në minutat e fundit për të barazuar 1‑1 me Getafen në çerekfinalen e parë të Kupës UEFA, Bajernit i nevojitej patjetër fitorja. Riberi ishte njeriu i duhur për të arritur këtë qëllim dhe, kur u fitua penalltia në minutën e 74‑t, për shkak të prekjes së topit me dorë në zonë, francezi e mposhti portierin kundërshtar që, gjithsesi e gjeti anën e topit pa mundur ta ndalë. Kur mbetej fare pak për t'u luajtur, një aksion i bukur i Bajernit u kurorëzua me një pasim me takë të Klozes për mbrojtësin Lel që, i gjendur në pozicion të volitshëm e vulosi rezultatin.

Në takimin tjetër të ditës së djeshme, Borusia e Dortmundit shënoi dy herë në minutat e fundit, duke e ndëshkua Bajer Leverkusenin me humbjen e tretë radhazi. Shtefan Kisling shënoi për miqtë në minutën e 51‑të, pas një gabimi trashanik të portierit verdhezi Mark Cigler, por Aleksander Frei në minutën e 88‑të dhe Dede në kohën shtesë e përmbysën rezultatin në 2‑1, duke u dhuruar dortmundasve fitoren.