Mançini: Goli i Vieirasë ishte i rregull

Pritej përgjigjja, dhe ajo erdhi. Interi ka mbajtur trysninë dhe ka "replikuar" ndaj suksesit të Romës, në mënyrën më të mirë të mundshme, duke fituar dhe bindur njëkohësisht. Pavarësisht nga tri pikët, nga sfida me Atalantën, Roberto Mançini ka marrë sinjale pozitive në aspektin e rendimentit nga ana e të tijve, siç konfirmoi edhe pas ndeshjes. "Ishte një ndeshje e mirë në një fushë të vështirë, kundër një skuadre në formë të shkëlqyer, - tha trajneri zikaltër. - Por edhe ne ishim mirë. Vieira dhe Kambiaso po kthehen në formë, sepse nuk kanë qenë mirë. Kambiaso është lojtar shumë inteligjent dhe i jep ekuilibër skuadrës, si në aspektin psikologjik ashtu edhe në atë të lojës. Një lojtar ndonjëherë bën ndryshimin, por problemi ynë ka qenë se kemi luajtur shpesh pa të, Stankoviçin dhe Vieiranë." Duke qëndruar te ky i fundit, francezi shënoi golin e parë, por Atalanta protestoi për një ndërhyrje të gabuar në rastin e kërcimit me kokë. Mançini shpjegon: "Vieira kërceu për të kapur topin dhe kundërshtari në fillim kërkoi ta pengojë, duke e kapur edhe nga fanella. Por nuk është ndërhyrje e gabuar, sepse të dy së bashku kërcejnë njëherësh".

Protagonist dje në Bergamo ishte edhe Baloteli, që e nisi ndeshjen nga minuta e parë. "Baloteli është djalosh i ri, që ka cilësi të mëdha, - vazhdoi trajneri zikaltër. - Duke qenë i ri, është edhe i shkujdesur, ndaj nuk e mendon as rëndësinë e ndeshjes, zbret në fushë dhe zbavitet. Roli i tij është ai i sulmuesit, por në këto momente kemi nevojë të luajë në krah. Sa ndikon fakti që Roma nuk bën asnjë hap të gabuar? Fare. Rëndësi ka që largësia të mbesë kaq sa ç'është. Problemi është se ne i kemi mësuar të gjithë me një pikavarazh të lartë, por kampionatet fitohen edhe me një pikë largësi. Ne deri më tani kemi luajtur ndeshje të vështira, pra gjithçka varet nga ne, jo nga Roma. Nëse ne vazhdojmë të fitojmë, nuk ka problem. A duhet përmirësuar Interi i sotëm? Koha kalon edhe për lojtarët, edhe për më të zotët. Sipas meje, një trajner, nëse fiton mund të qëndrojë edhe 6-7 vjet. Për lojtarët kalon koha, ndaj është e vështirë që të luajnë gjithnjë në të gjitha ndeshjet. Zaneti, për shembull është i gatuar prej "hekuri", por ka nevojë të pushojë. Edhe ndonjë lojtar më i ri mund të jetë i vlefshëm gjatë vitit."