Interi sërish +4, Fiore mban larg Milanin

Interi nuk fal më! Zikaltrit kanë rinisur marshimin, duke thyer në mes ëndrrat e Romës për të kapur kreun, pas fitores të së shtunës në Olimpiko ndaj Xhenoas. Verdhekuqve nuk u mjaftoi suksesi 3-2 ndaj kuqebluve të Gasperinit, i cili ishte fryt i penalltisë së De Rosit në minutën e 80-të, pasi Rosi dhe Leon e neutralizuan brenda një minute avantazhin e dyfishtë të kryeqytetasve me anë të Tadeit dhe Vuçiniçit, për ta ngushtuar diferencën me kryesuesit që u kthyen si të tillë edhe në aspektin e lojës në "Atleti Azzurri d'Italia" të Bergamos. Vieira me kokë në pjesën e parë dhe Baloteli, që shënoi golin e parë në Serinë A, në pjesën e dytë, i dhuruan Interit fitoren e çmuar 2-0 ndaj një Atalante që nuk arriti thuajse për asnjë çast të dilte në lojën e saj. Pra djemtë e Mançinit kanë ruajtur epërsinë prej 4 pikësh nga vendi i dytë, kur duhen edhe 6 ndeshje që kampionati të përfundojë.

Ashtu sikurse edhe Fiorentina e ka ruajtur avantazhin prej katër pikësh nga vendi i pestë, i cili mbahet tani bashkarisht nga Milani dhe Sampdoria. Vjollcët e Prandelit e shohin gjithnjë e më pranë Championsin e shumëdëshiruar, falë golit të të rilindurit Pacini; më pas ata vuajtën për një pjesë të tërë trysninë e Rexhinës dhe në minutat shtesë shënuan golin e dytë me anë të të zakonshmit Mutu. U regjistrua një shtyllë e Briencës dhe një traversë e Paskualit, vetëm sa për të nënvizuar dy raste të një ndeshjeje tepër të bukur. Ndërkohë që Sampdoria po bën shumë më tepër se sa ajo që është detyra e saj, pasi tani gjenovezët u janë bashkuar kuqezinjve në kuotën e 52 pikëve, pas fitores 2‑0 në "Ferraris" ndaj një Livornoje të xhindosur me arbitrin Romeo për një gol që iu anulua Tavanos. Kthimi i Kasanos i dhuroi klas dhe fantazi Sampit, i cili gjithsesi ka ndërmarrë një varg rezultatesh pozitive (shtatë), edhe pse golat u shënuan nga Maxhio dhe Bonacoli në pjesën e dytë.

Pra, në kuadër të Championsit, e vetmja që e ka ngadalësuar ritmin ka qenë Udinezja, e cila barazoi 1-1 në Sienë. Djemtë e Marinos madje rrezikuan të humbisnin në "Franki", pasi kaluan në disavantazh nga goli i madh që shënoi Kharzha, kur më parë kishin goditur shtyllën me Dosenën. Por ata në fund desh fituan, sepse pas barazimit të menjëhershëm të Floro Floresit, Pepe dhe Di Natale shpërdoruan dy raste të mira për shënim.

Ndërkohë që renditja në vendet e larta është disi më e qartë, janë të shumta skuadrat që luftojnë për të mos rënë nga kategoria. Empoli dhe Katania arritën dy fitore shumë të rëndësishme. Kanji i porsakthyer mundi menjëherë 1‑0 Torinon në Olimpiko, duke i ngjitur të kaltrit në vendin e katërt nga fundi me 29 pikë. Ishte Vanuki ai që i ndëshkoi me një gol në minutat e fundit të kuqërremtët, të cilëve u mungoi fati, duke qenë se e goditën dy herë traun me Motën dhe Rekobën. Sakaq, s'kishte si të kishte një debutim më të mirë për Valter Zengën. Katania e tij fluturon në kuotën e 32 pikëve, duke e mundur me rezultatin e pastër 3-0 Napolin, i cili ishte i qetë dhe pa shumë stimuj. Ndërsa Parma nuk mund të ndihet e kënaqur me barazimin në fushën e saj ndaj Lacios. Ishte një barazim i drejtë, por që i mban verdheblutë në kuotën e 30 pikëve, në zonat tepër të nxehta të renditjes. Budani i krijoi iluzione Kuperit, ndërsa Pandev dhe Bianki, me një gol të jashtëzakonshëm, e rizbritën me këmbë në tokë përpara se Paçi ta fiksonte rezultatin në shifrat 2‑2.