De Rosi: Besojmë te titulli dhe te Championsi!

Mesfushori i Romës, Daniele De Rosi, foli pas ndeshjes Roma‑Xhenoa: "Tifozët tanë kështu kanë qenë gjithnjë, aq më shumë këto vitet e fundit, kur ata janë pjekur së bashku me këtë skuadër. Duartrokitjet dhe inkurajimi pas ndeshjes Roma‑Mançester vlen edhe më shumë sesa kur mbërrijmë në Fiumiçino dhe ka 2‑3 mijë persona që na presin. Pas ndeshjes ndaj Mançesterit, ishte një moment i vështirë si për ne ashtu edhe për ata. U bashkuam me njëri-tjetrin dhe do të ecim përpara. Më pas do të shohim se ç'do të ndodhë, por skuadra duhet të jetë krenare për tifozët që ka dhe anasjelltas". Interi ndodhej përkohësisht 1 pikë larg të shtunën, por kjo distancë u kthye në +4 dje pasdite, pasi zikaltrit fituan në Bergamo: "Ne duhet të vazhdojmë të marrim pikë dhe të shpresojmë që ata të marrin sa më pak që të jetë e mundur". Titulli ndodhet më pranë: "Ne kishim besim, edhe kur ishim ‑7 apo ‑9, e jo më tani. Edhe pse ata kanë disa ndeshje delikate, sikurse, nga ana tjetër kemi edhe ne. Do të jetë një fundkampionati i bukur, por për ne do të jetë edhe më emocionues, duke qenë se kemi dy vite që vrapojmë pas tyre dhe tani i kemi më pranë." Të mërkurën e ka radhën Mançesteri në Champions: "I kemi të gjitha mundësitë për t'ia dalë mbanë, u kemi shënuar edhe skuadrave të tjera të rëndësishme si Mançesteri dy gola në transfertë. Më pas do të na duhet pakëz fat, pasi është një ndeshje tepër e vështirë, por ne do të tentojmë dhe mund t'ia dalim mbanë". Lidhur me shitjen e klubit, De Rosi u shpreh i matur: "Kemi presidentin tonë dhe gjithë familjen Sensi që e drejton klubin tonë. Mendoj se ajo që ka bërë klubi 3-4 vitet e fundit, së bashku me skuadrën, nuk është për t'u nënvlerësuar. Nëse më pas ka ndonjë që investon 1 miliard dollarë, kështu është shumë e lehtë. Unë dua drejtuesit që kam, por më pas mund të pranohet gjithçka, si dhe të shpresojmë gjithnjë që Roma të jetë sa më e fortë. Sidoqoftë, kontrata ime nuk ka të bëjë me këto çështje; unë kur do ta rinovoj, do ta rinovoj me Sensin, Pradénë dhe Bruno Kontin".