Slomka: Treguam shumë respekt për Barçën

Trajneri i Shalkes, Mirko Slomka, tha se lojtarët e tij nuk do ta përsëritin gabimin e bërë të martën, kur treguan shumë respekt ndaj Barcelonës, më tepër sesa duhej, edhe në çerekfinalen e kthimit të Ligës së Kampionëve, që do të luhet në "Kamp Nou". Pasi pësuan golin e katalanasve, që në fillim të ndeshjes, dhe pas një pjese të parë të ndrojtur, skuadra e Bundesligës nuk pati fat për të gjetur golin e barazimit, sepse në pjesën e dytë ua bëri qejfin tifozëve në "Arena AufShalke". Një gol i Bojan Kërkiç në minutën e 12‑të u mjaftoi katalanasve. "Respekti ynë për ta zgjati më shumë sesa duhej në fillim, ndërsa në pjesën e dytë të takimit u treguam më guximtarë dhe krijuam shumë raste për shënim, - tha Slomka në konferencë për shtyp. - Ne e dinim që do të kishim mundësitë tona, meqenëse ata kanë pësuar shumë gola kohët e fundit."

Trajneri i "bluve mbretërorë" vijoi shpjegimin e tij: "Natyrisht që nuk mund të mendojmë se do të luajmë po aq fort përgjatë 90 minutave në Barcelonë, por duke parë atë paraqitje në pjesën e dytë, unë besoj se ende kemi një mundësi kualifikimi. Thjesht, duhet ta shfrytëzojmë!" Shalke ka hasur shumë vështirësi në gjetjen e rrugës drejt rrjetës në këtë sezon të Ligës së Kampionëve, duke shënuar vetëm gjashtë gola në nëntë takime. Soren Larsen shpërdoroi një rast me kokë, ndërsa Valdes bëri mrekullinë ndaj gjuajtjes së Marselo Bordonit në minutat e fundit të lojës, duke mos e shprishur epërsinë e katalanasve, në kuadër të ndeshjes së kthimit më 9 prill.

Skuadra që do të kualifikohet do të ndeshet me shumë mundësi me Mançester Junajtidin në gjysmëfinale. "Në Ligën e Kampionëve është thelbësore që të realizosh raste si ato që patëm ne, - shtoi i mërzitur Mirko Slomka. - Fatkeqësisht, disa prej lojtarëve tanë më krijues ishin të dëmtuar të martën dhe ne e ndiem mungesën e tyre. Ndoshta një apo dy prej tyre do të rikthehen për takimin e kthimit, gjë që do të na ndihmonte shumë."