Rajkard: Të qëndrojmë të bashkuar!

Në përfundim të ndeshjes me Getafen (0?0), trajneri i Barcelonës, Frenk Rajkard, u kërkoi lojtarëve të tij që të qëndrojnë të bashkuar për të ndihmuar skuadrën në këtë moment të vështirë. “Duhet të tregojmë forcën tonë dhe të qëndrojmë të bashkuar. Eshtë një moment i vështirë për ne, të cilin duhet ta kalojmë me çdo kusht. Më vjen keq që u krijua një situatë e tillë, por nuk duhet të dorëzohemi. Të gjithë së bashku duhet të punojmë për ta ndryshuar këtë situatë”, tha Rajkard, i cili komentoi edhe reagimin e tifozëve në “Camp Nou”, të cilët vërshëllyen lojtarët për barazimin e arritur. “Mendoj se skuadra meriton më shumë respekt për atë që po bën. Lojtarët po bëjnë punën e tyre, por edhe fati nuk është me ta. Ata kanë nevojë për mbështetje për të ecur ërpara. E dimë që do të jetë shumë e vështirë, megjithatë do të luftojmë deri në fund. Ndoshta publiku mund ta ketë acarimin e tij me një person, por lojtarët kanë shumë nevojë për mështetje. Tifozët janë zemra e skuadrës”. Për sa i përket takimit të zhvilluar në “Camp Nou”, Rajkard tha se skuadra e tij ishte e pafat në gjetjen e golit. “Nuk mund të fitohen të gjitha ndeshjet, edhe pse nuk duhet të harrojmë se kemi goditur tre herë shtyllën dhe kemi humbur dy apo tre raste flagrante për gol. Nuk ka qenë një nga ndeshjet tona më të mira, por luftuam deri në fund për të marrë atë që donim. Rastet ishin të shumta, por kur topin nuk hyn në rrjetë, atëherë nuk kemi çfarë të bëjmë. Nëse do të kishim pak fat, atëherë tashmë gjithçka do të ishte ndryshe. Kur shënon një gol, gjithçka ecën ndryshe dhe skuadra fiton sigurinë e duhur. Megjithatë, duhet ta harrojmë këtë ndeshje dhe të mendojmë për takimet e ardhshme”, tha Rajkard, duke iu referuar takimit të kthimit në Champion League përballë Shalkes. “Do të jetë një ndeshje shumë e rëndësishme, por edhe e vështirë në të njëjtën kohë. Nuk mund dhe nuk duhet të gabojmë. Luajmë në fushën tonë dhe shpresoj që këtë herë të kënaqim tifozët tanë, të cilët kanë të drejtën e tyre të sillen si të duan”.