Lipi: Ky Inter i ngjan shumë Juventusit tim!

Europani në Austri dhe Zvicër është duke afruar, por e ardhmja e Roberto Donadonit vazhdon që të jetë në diskutim. Mungesa e rinovimit nga trajneri axurr, që refuzoi rinovimin e kontrats, në rast se do të arrijë kualifikimin në gjysmëfinale, nuk ka ndihmuar për të zgjidhur problemet. Në vend të tij, në pankinën e Italisë, janë hedhur disa alternativa, nga Karlo Ançeloti, te Marçelo Lipi. Në një intervistë për “Guerin Sportivo”, trajneri kampion bote është shprehur: “Nuk e përjashtoj mundësinë që një ditë të rimarr drejtimin e Kombëtares axurre, sepse më pëlqen ai rol, të punoj me djem të shkëlqyer”, tha Lipi, i cili më pas ka folur për kampionatin dhe është ndalur te Interi, një ekip të cilin ai ka drejtuar, por që sot e krahason me Juventusin e dikurshëm: “Shoh te Interi i sotëm një konkretësi dhe një vendosmëri të barabartë me Juventusin që kam stërvitur. Ekipi i Mançinit është një anije e madhe, aeroplanmbajtëse. Roma? Luajnë futbollin më të bukur për momentin, por më pëlqen edhe Fiorentina, që i ngjan shumë Arsenalit. “Zonja”? Eshtë e njëjta, mentaliteti nuk ndryshon”.