AVRAM GRANT I BINDUR NË KUALIFIKIMIN E CHELSEAT NË GJYSMËFINALE TË LIGËS SË KAMPIONËVE

Menaxheri i Chelseat, Avramt Grant, është shprehur i bindur që Chelsea do ta mposhtë Fenerbahchen dhe do të depërtojë në gjysmëfinale të këtij edicioni në garën më prestigjioze evropiane për skuadra Ligën e Kampionëve. Këto fjalë trajneri izraelit i ka thënë në konferencën për media para ndeshjes së kthimit që sonte skuadra e miliarderit rus Roman Abramovich, e zhvillon kundër gjigantit turk Fenerbahche. Blutë e Londrës në takimin e parë të zhvilluar në Stamboll edhe pse avanconin 1:0 në fund kokulur e lëshuan fushën e stadiumit Shukru Saraqolu, pasi u mposhtën 2:1. "Çfarë ka ndodhur në Stamboll ka ndodhur, ajo nuk mund të ndryshojë, nëse e shikojmë nga aspekti futbollistik nuk është rezultati i keq, kemi mundësinë që të rikthejmë gjithçka falë golit të shënuar në udhëtim. Besoj se në këtë takim do ta shihni një Chelsea krejt tjetër, ka thënë Grant, i cili është kritikuar nga mediat angleze për taktikën e dobët të aplikuar në pjesën e dytë kundër Fenerit. Chelsea edhe në këtë ndeshje do të paraqitet pa portierin çek Peter Cheh, të cilin do ta zëvendësojë italiani Carlo Cudichini, por kjo nuk e shqetëson shumë mesfushorin gjerman Michael Balack, i cili ka deklaruar se blutë kanë rekord mbresëlënës të ndeshjeve në shtëpi. Chelsea krahas titullit të Ligës së Kampionëve, seriozisht i ka shtuar gjasat për titullin e Premier Ligës, pasi aktualisht ka tri pikë më pak se lideri Manchester United, të cilin ekip do ta pretë në shtëpi. Nga ana tjetër, edhe Fenerbahche po lufton në dy fronte në Ligën e Kampionëve dhe në kampionat, ku gjendet në vendin e parë me dy pikë më shumë se rivali i përjetshëm Galatasaray. Por për kanarinat Liga e Kampionëve këtë edicion është satisfaksion tjetër këtë e dinë shumë mirë të gjithë pasi në rast të depërtimit në gjysmëfinale do të bëhen skuadra e parë turke që e arrin një sukses të tillë. Për ish-sulmuesin e Brightonit dhe Sheffield Unitedit, Colin Kazim Richards, i cili në Stamboll e shënoi golin e barazimit, Fenerbache kurrë më afër gjysmëfinales dhe kanë mundësi ta arrijë një gjë të tillë, pasi aktualisht kanë skuadër mjaft të fortë dhe mirë të komponuar. Fituesi i këtij takimi në gjysmëfinale për kundërshtar do ta ketë fituesin e ndeshjes Liverpool-Arsenal që zhvillohet nesër. Ndërkohë në takimin tjetër çerekfinale sonte në Kam Nou, Barcelona e pret Schalke04. Blaugranët kanë epërsinë e terrenit vendas dhe të rezultatit nga ndeshja e parë që kishte përfunduar 1:0.