Slomka: Nuk na duhet mrekullia!

Trajneri i Shalkes, Mirko Slomka, këmbëngul që skuadra e tij nuk ka nevojë për një mrekulli për t’u kualifikuar në gjysmëfinalet e Champions League. “Blutë mbretërorë” kanë nevojë të përmbysin në “Camp Nou” humbjen minimale të ndeshjes së parë dhe trajneri gjerman beson që skuadra së tij do t’i mjaftonte më e mira që di të bëjë për të shkaktuar një surprizë të bujshme. “Barcelona është një skuadër shumë e mirë dhe ka disa lojtarë të mrekullueshëm, por ne do të shkojmë në fushën e tyre për të tentuar fitimin e ndeshjes”, deklaroi Slomka në konferencën për shtyp të ditës së martë. Shalke nuk është kualifikuar kurrë në historinë e saj në gjysmëfinale të Champions League, por Slomka shton: “Të thuash që kemi nevojë për një mrekulli është një ekzagjerim. Nëse lojtarët japin më të mirën dhe luajnë një ndeshje të mirë si individualisht ashtu edhe kolektivisht, atëherë nuk kam dyshime që mund ta fitojmë ndeshjen dhe të kualifikohemi”. Forma e Barcelonës në ndeshjet e fundit është bërë objektiv i fortë kritikash për shtypin spanjoll. Gjigantët katalanas kanë fituar vetëm një prej tetë ndeshjeve të fundit, por Slomka mendon se nuk ka kurrë një “moment të mirë” për të luajtur ndaj Barcelonës. “Vetëm sepse barazuan pa gola me Getafen në javën e fundit të kampionatit nuk është e drejtë të thuhet që Barcelona nuk është në formë të mirë. Ky nuk është aspak një shembull i goditur sepse Getafe luajti në “Camp Nou” për të mos pësuar gol, ndërsa ne duhet të shënojmë domosdoshmërisht për t’u kualifikuar”. Në fund, Slomka e komentoi kështu mungesën e Mesit, Dekos dhe Ronaldinjos: “Të gjithë futbollistët e Barcelonës janë të rrezikshëm. Këto tre mungesa janë të rëndësishme, por zëvendësohen nga lojtarë të tjerë të mëdhenj si Ksavi apo Iniesta. Barça mbetet një skuadër shumë e fortë edhe pa Ronaldinjon, Dekon e Mesin”.

Altintop: Jam shumë optimist

Sulmuesi turk, Halil Altintop ka besim të verbër në mundësitë e skuadrës së tij për të avancuar më tej. “Duam të fitojmë, të avancojmë në gjysmëfinal të Champions dhe besoj se kemi një shans të mirë për t’ia dalë mbanë. Në ndeshjen e parë meritonim shumë më tepër, por nuk patëm fat. Nuk luajtëm mirë në pjesën e parë, por në të dytën e dominuam ndeshjen dhe kjo na bën që të ndihemi shumë optimistë përpara vizitës në “Camp Nou””.

Asamoah: Mund t’ia dalim!

Gerald Asamoah, sulmuesi i kombëtares gjermane vë bast për Shalken: “Pa dyshim, është e qartë që do të jetë shumë e vështirë, por askush nuk besonte që kishim një shans për t’u kualifikuar deri këtu. Më pas, askush nuk besonte që kishim në shans ndaj Barcelonës dhe në ndeshjen e parë në shtëpi treguam që jemi në gjendje t’i mbyllim në portën e tyre për 45 minuta. Kemi nevojë për pak fat, por nuk ka dyshime që kemi cilësinë për t’ia dalë mbanë”.

Kuranji: Nuk jemi dorëzuar!

Sulmuesi i Shalkes, Kevin Kuranji i bashkohet shokëve të tij në optimismin përpara “zbarkimit” në Barcelonë. “Luajtëm agresivisht në pjesën e dytë në shtëpi, pa frikë dhe kjo është ajo që duhet të bëjmë edhe në “Camp Nou”. Fakti që Barça do ta nisë si favorite nuk do të thotë që gjithçka ka përfunduar. Ne e dimë që mund ta përmbysim rezultatin, e dimë që mund të shënojmë në “Camp Nou” dhe po presim me padurim që ta vërtetojmë këtë”.