Venger: Nuk e gëlltis dot!

Trajneri i Arsenalit, Arsen Venger, fajësoi nivelin e gjykimit për eliminimin e skuadrës së tij në çerekfinalet e Champions League. Ai deklaroi: “Mendova se ndeshja përfundoi në rezultatin 2�2, por u dha ajo penallti e paqenë që ndryshoi gjithçka. Eliminimi është i vështirë për t’u gëlltitur duke parë se si luajtëm në të dyja ndeshjet. Në ndeshjen e parë nuk na u dha një penallti e qartë dhe në të dytën u dha një tjetër e paqenë kundër nesh. Në fund, mendoj se ishin vendimet e gjyqtarëve dhe jo cilësia e skuadrave ajo që bëri ndryshimin. Lojtarët në dhomat e zhveshjes ishin shumë të dekurajuar sepse ndiejnë që vendimet e gjyqtarëve po i dëmtojnë javë pas jave”.

Një gol nga Emanuel Adebajor shtatë minuta përpara përfundimit u duk se do t’i jepte Arsenalit kualifikimin me gola në fushë kundërshtare, por avantazhi zgjati vetëm një minutë. Kolo Ture u përplas në zonë me zëvendësuesin Rajan Babel dhe italiani Roseti akordoi një penallti, të cilën Xherard e transformoi në gol. “Nuk ishte një penallti”, vazhdon Vengeri. “Pashë përsëritjet dhe mund ta them me siguri këtë, ashtu siç mund të them me siguri që duhet të na ishte dhënë një penallti në ndeshjen e parë. Ajo po që ishte penallti. Nuk arrij ta kuptoj se si një gjyqtar mund të japë me aq lehtësi një penallti në një ndeshje aq të madhe si ajo. Në rezultatin 2�2 nuk duhet t’i kishim dhënë asnjë shans Liverpulit, por na mungoi përvoja dhe bëmë disa gabime që nuk duhet t’i kishim bërë”.