Shqipëria vishet me “Nike

Në unison të gjitha skuadrat përfaqësuese të futbollit për dy vitet e ardhshme ka shumë mundësi që të vishen me komplete sportive të tipit “Nike”. Federata Shqiptare e Futbollit është pranë një akordi me kompaninë amerikane dhe pritet që shumë shpejt të bëhet edhe zyrtarizimi marrëveshjes. “Kontrata që kishim me Umbron ka përfunduar, ndërkohë që ne kishim një akord paraprak me Puma, deklaroi Kokona, megjithatë mendoj se kemi arritur gjithashtu një akord shumë të rëndësishëm me Nike dhe ka shumë mundësi që shumë shpejt të hidhet firma. Nike do të sponsorizojë me bazë materiale të gjithë skuadrat përfaqësuese jo vetëm për uniformat por edhe për të gjitha llojet e aksesorëve. Gjithashtu Nike do të bëjë një marëveshje me Tramondin që të marrë edhe ekskluzivitetin e topave. Drejtuesit e Nike kanë shfaqur dëshirën që të furnizojnë me bazë materiale edhe skuadra të Kategorisë Superiore, megjithatë kjo mbetet për t’u diskutuar me klubet”. Nike po bën një fushatë të fortë promovuese për të marrë ekskluzivitetin e skaudrave përfaqësuese në Evropë pas një përhapje të madhe në vendet jo evropiane.