Cikloni” Kaka “fshin” Rexhinën!

MILAN 5

REXHINA 1

Shënues: Kaka 8' (p), 34' (p), 68'. Inzagi 73', Pato 89'/ Barreto 40'

E diel, 20 prill 2008, ora 15:00, në stadiumin “San Siro” të Milanos

Milan (4�3�2�1): Kalaç, Kafu (Simiç 76'), Nesta, Kaladze, Favali, Gatuzo (Gurkuf 80'), Pirlo, Broki, Kaka, Sedorf (Pato 68'), Inzagi. Tr.: Ançelott.

Rexhina (3�4�2�1): Kampanjolo, Valdez (Alvarez 69'), Çirilo, Aronika, Vixhiani, Barreto (Misiroli 48'), Tonjoci, Modesto (Kosta 82'), Brienca, Amoruzo. Tr.: Orlandi.

Gjyqtar: Farina

“Stuhia” Kaka shkatërron Rexhinën. Një “ciklon” i papërmbajtshëm, i karakterizuar nga një tripletë. “Topi i Artë” dhuron një paraqitje të jashtëzakonshme, duke mposhtur dy herë nga pika e bardhë e penalltisë, Kampanjolon, dhe duke e dërguar në këndin e poshtëm të portës kalabreze një top të goditur me gjeometri. Lavdi edhe për Inzagin dhe Paton, me brazilianin i cili i futur në vend të Sedorfit, në fillim godet shtyllën (topi i kthyer dërgohet në rrjetë nga SuperPipo), ndërsa disa minuta më vonë shënon me një gjuajtje të bukur me kokë. Në mes, “kryevepra” e Barretos. Tre pikë për të mbajtur ndezur shpresën për vendin e katërt, që do të thoshte Champions League, edhe pse kalendari i Fiorentinës duket më i lehtë, në krahasim me kuqezinjtë, që nuk i mbetet vetëm se të luftojnë dhe të fitojnë edhe katër ndeshjet e mbetura.

Gatuzo për Sedorfin: Nuk mund ta duroj më!

Mes gëzimit për fitoren e thellë ndaj Rexhinës ka edhe një epoisod të shëmtuar, që konfirmon “divorcin” e Gatuzos me Milanin. Në pjesën e dytë, në minutën e 68�të, kur kuqezinjtë kanë shënuar golin e tretë, me Kakanë, Rino ka shkuar te Ançeloti, në pankinë, dhe i ka thënë: “Nuk mund ta duroj më. Ai jo vetëm që nuk vrapon, por as që mbulon njeri...!”. Referimi ka qenë i qartë: Klarens Sedorf. Në fakt, holandezi, kur është zëvendësuar me Paton, ka dalë nga fusha e blertë mes vërshëllimave të publikut në “San Siro”.

Ançeloti: Duhet të besojmë!

“E kemi nisur shumë mirë ndeshjen, me shpejtësnë dhe vendosmërinë e duhur. Fakti që e zhbllokuam shumë shpejt rezultatin na dha mundësi që të shfrytëzonim hapësirat dhe gjthçka u bë edhe më e lehtë”, në këtë mënyrë e komentoi Karlo Ançeloti fitoren e djeshme me Rexhinën, duke shtuar. “Rikuperimi i Kakasë ishte i rëndësishëm, sepse tani është duke gjetur formën më të mirë dhe është e qartë se ai është një lider në këtë aspekt. Jemi ende të shkëptur nga Fiorentna dhe për fat të keq lufta për Champions nuk varet vetëm nga ne, por kemi detyrimin që të përgatisim sa më mirë katër ndeshjet e ardhshme, duke i fituar dhe duke pritur çfarë do dodhë”.

Kaka: Shpresa vdes e fundit!

Rikardo Kaka, fituesi i “Topit të Artë”, ka udhëhequr dje Milanin drejt një fitoreje të rëndësishme dhe të merituar ndaj Rexhinës. Për brazilianin tre gola (dy me penallti). Por, vendi i katërt është ende katër pikë larg: “Fiorentina po zhvillon një sezon të jashtëzakonshëm, por deri sa të kemi mundësinë matematikore duhet të besojmë dhe të shpresojmë”, tha fantazisti i “Djallit” për “Sky”. “Dëshira ynë është që të arrijmë Champions me çdo kusht”. Në lidhje me zërat që flasin për largimin e Gatuzos, braziliani shprehet: “Eshtë e vërtetë që ai ka shprehur këtë dëshirë. Mendoj se mund të ketë shumë surpriza në këtë fund sezoni, kur të nisë merkato. Por, Rino ka shumë arsye për të qëndruar te Milani”.