Manço: Ibra iku prej presionit!

Për të kuruar gjurin dhe për mbajtur të fshehur ankthin e rikthimit, që rrezikon të shtyhet më shumë se dhjetë ditë. Në këtë mënyrë e ka shpjeguar Roberto Mançini zgjedhjen e Zlatan Ibrahimoviçit për të shkuar në Malmo dhe për t’iu nënshtruar një terapie e cila do ta ndihmonte që të kalonte shqetësimet dhe këtë dëmtim. “Mendoj se ka shkuar në Suedi, edhe për t’iu larguar presionit që ekziston në Itali”, tha trajneri zikaltër. “Sidoqoftë, punën është duke e kryer. Në Malmo ka fizioterapistin e tij personal dhe të besuar dhe mund të stërvitet i qetë, jo me mendjen se duhet të japë maksimumin për t’u rikuperuar për të dielën në vazhdim. Kjo periudhë pushimi mund t’i bëjë shumë mirë”. Si ka mundësi që Zlatani ndjen kaq shumë presion? “Fakti që duhet të punojë dhe të sforcohet është një formë presioni dhe shqetësimi. Kur mund të kthehet? Në të vërtetë, shpresoja që ta kisha në këto dy javë dhe të punojë me të, por uroj që të jetë me Kaljarin”. Të gjithë duan ta shohin në derbin e 4 majit me Milanin: “Të kthehet njëherë dhe të stërvitet me vazhdimësi, sepse për atë ndeshje mund të jetë edhe në 100% të formës. Ibra është larguar prej meje? Jo, nuk është e vërtetë, raporti ynë është i shkëlqyer. Ai thjesht po kurohet”, tha Mançini, që më pas e ka spostuar argumentin te ndeshja e sotme me Torinon. “Vështirësitë janë gjithmonë të njëjtat edhe pse, me trajnerin e ri, lojtarët japin më shumë në paraqitjen e parë. Pastaj, le të themi se De Biazi është një njeri që i njeh mirë futbollistët e Torinos, sepse i ka stërvitur edhe më parë. Toro ka një skuadër të mirë, që ka grumbulluar shumë pak, në krahasim me atë që ka dhënë. Nuk është një skuadër në krizë, ndoshta janë nën presion, sepse të jesh i rrezikuar në fund të klasifikimit është gjithmonë një shqetësim i madh për të gjithë”. Kampionati është i hapur: “Do të jetë deri në fund, sepse gjithmonë flitet për ndeshje të vështira. Askush nuk toleron. Kështu do të jetë gjithmonë, sepse asnjë skuadër nuk është e siguruar për diçka”