Milani: “Dinjo kushton shumë!

Milani “frenon” në pistën Ronaldijo. Një “stop” befasues dhe i menjëhershëm, i papritur, pikërisht në momentin kur gjithçka ishte vendosur. Fjalët e administratorit të deleguar kuqezi, Adriano Galianit, janë tepër domethënese dhe alarmojnë tifozët e “Djallit”: “Nuk e di nëse marrëveshja do të arrihet, sepse ne operacionet e merkatos i bëjmë në kushte të cilat i cilësojmë si të duhura: nëse do të arrijmë të kuptohemi me drejtuesit e Bacelonës, shumë mirë, ndryshe, do të ndryshojmë objektiv. Për momentin nuk ka asnjë të re”. Galiani, në mbërritjen e tij në Ligë, dje ka sqaruar disa gjëra: “Nuk kam thënë kurrë se ishim pranë arritjes së marrëveshjes me Barçën, por se me lojtarin kishim rënë dakord. Nuk po bëj lojëra fjalësh, por po them të vërtetën”, shtoi zëvendës presidenti i Milanit, duke mos përjashtuar faktin se për brazilianin është hapur një ankand i vërtetë: “Për Ronaldinjon ka edhe skuadra të tjera, jo vetëm Interi. Tashmë kam shumë vite që bëj këtë merkato dhe këtu nuk ka asgjë të çuditshme: nëse Barcelona do të pranojë kushtet tona, atëherë gjithçka do të kryhet. Por, ka edhe një muaj kampionat dhe ndaj kemi kohë”. Një muaj në të cilin kuqezinjtë duhet t’i fitojnë të gjitha ndeshjet për të shpresuar te Champions: “Do të besojmë deri javën e fundit!”.

Agjenti i Gatuzos: Në bisedime me klubin

Kladio Paskualin, agjenti i Xhenaro Gatuzos, ka folur për situatën e klientit të tij, duke bërë një ndërhyrje telefonike për “Radio Kiss Kiss”: “Rino është një milanist i lindur dhe e ndjen peshën e fanellës kuqezi. Pavarësisht nga ato që thuhen, ai dëshiron të qëndrojë te kjo skuadër, por duhet të sqarohemi me klubin, me të cilin jem në bisedime e sipër”.

Berluskoni fiton zgjedhjet, Milanit i jepet penallti!

Të dielën, në “San Siro”, ka ndodhur diçka që ndoshta, në një situatë tjetër, me pak fjalë, nëse presidenti i Milanit, Silvio Berluskoni, s’do të kishte fituar zgjedhjet paralamentare në Itali, s’do të ishte verifikuar. Gjyqtari Farina ka akorduar dy penallti për kuqezinjtë, për dy ndërhyrje jo edhe aq shumë të rënda, nga Modesta dhe Vixhiani, në dëm të Kakasë dhe Sedorfit. Nuk ndodhte prej shumë javësh në Serinë A dhe një tifoz mund të ketë menduar: “Duhet të fitonte Berluskoni zgjedhjet që të jepeshin penallti në favor të Milanit”. Natyrisht, politika nuk ka të bëjë, por ndoshta ndonjëherë interesat dhe influenca e saj kanë të bëjnë drejtpërdrejt me futbollin dhe tifozët e Milanit kanë nisur të mendojnë se kohët do ndryshojnë dhe kuqezinjtë nuk do të dëmtohen më në kampionat, ndoshta sepse filozofia e Gusonit qëndron plotësisht: “Italianëve u pëlqen që të ngjiten në karrcën e fituesve...!”.