sex and the city dhe realiteti i njujorkut

A është realisht e mundur që një femër e vetmuar me rrogë prej një çikë më shumë se 4000 dollarë në muaj, sa merr Carrie, të bëjë jetë aq të luksoze dhe të harxhojë me mija dollarë në këpucë? Cila është me të vërtetë jeta intime femrave të Nju-Jorkut dhe si sillen meshkujt e këtij metropoli

Ju që përcillni me kujdes serinë televizive “Sex and the City”, i dini po thuaj të gjitha imtësitë në lidhje me katër kryeprotagonistet e saj. Kësaj rradhe nuk do të merremi me ndodhitë e katërshës, por me realitetin e kësaj serie. Pra, pyetjet që do të shrohen janë: sa janë të vërteta ngjarjet që paraqiten në ”Sex and the City”?

Përgjigjen në këto pyetje do ta kërkojmë te 29 vjeçarja Georgina Blau, adhuruese e madhe e kësaj serie. Përveç kësaj, edhe profesioni i Georginas ka të bëjë me serinë, meqë ajo fiton para duke shëtitur për tri orë të tëra turistët nëpër vendet ku zënë vend ngjarjet e “Sex and the City”

Përderisa në videon e autobusit shfaqen episodat e serisë, turistët e shumtë përmes Georgines mësojnë se ku jeton Carrie (kryeprotagonistja e serisë, aktorja Sara Jessica Parker), ku blen rrobat e saja e të tjera. Janë 12 vende të këtilla të cilat vetëm sa shtojnë popullaritetin e serisë.

Shumë prej turistëve pyesin Georginan, a mund një mend Carrie të jetojë ashtu si në seri, duke bërë harxhime të mëdha.

Georgina u përgjigjet: “Rroga e Carriet është diku 50 mijë dollarë në vit. Në periudhën tre mujore të ngjarjeve të përshkruara në seri ajo ka blerë pesë palë këpucë të “Manolo Blahnik”-ut dhe pesë palë të “Jimmi Choos” (një palë këpucë kushtojnë 1100 dollarë).

Carrie po ashtu ka blerë rroba në vlerë prej 1200 dollarësh dhe disa cikërrime të tjera që kushtojnë goxha shtrenjtë. Po t’i bëjmë një hesap këtyre harxhimeve të saja për cikërrime del se gjysma e rrogës i ka shkuar asaj në to, ndërkohë që qiraja mujore për banesën e Carrie-t në Uper East Side është hiç më pak se 2500 dollarë në muaj” – shpjegon Georgina Blau.

Thënë shkurt, seria është shumë-shumë larg realitetit të femrave që jetojnë të vetmuara në Nju-Jork. ”Nuk mund të paramendoj të harxhoj 600 dollarë për këpucë. Në atë rast do të duhej ta shisja qenin tim, ndërsa unë mendoj që qeni është më i rëndësishëm se këpucët”, thotë aktorja e re, Katie Stewart, e cila herë pas herë i ndihmon Georginas. Përndryshe, Katie Steward thotë që ajo personalisht nuk njeh askë që mbath këpucë të firmës ”Jimmy Choo”.

Jo vetëm këpucët dhe rroga, por edhe jeta intime e femrave të Nju-Jorkut është shumë ndryshe nga ç’paraqitet në këtë seri. Edhe pse një e treta e banorëve të Nju-Jorkut jeton në vetmi, nuk është aspak e lehtë të krijohet një lidhje dashurie. Të gjithë ata që janë këtu synojnë karrierë. Prandaj, të gjithë kanë plane pesëvjeçare apo edhe dhjetëvjeçare. “Unë asesi nuk po arrij të ‘inkuadrohem’ në planet e dikujt”, ankohet Katie. “Askush prej tyre nuk dëshiron martesë”, shton Georgina. Derisa në seri, kur dikush thotë “do të thërrasë në telefon(për të caktuar takim)”, kjo ka domethënien se “do të shihemi së shpejti”, në jetën reale, sipas Georginas, kjo ka një kuptim krejtësisht tjetër: ”Lamtumirë!”

Një fakt tjetër përkeqëson akoma gjendjen e femrave në Nju-Jorku: në këtë metroplol ka më shumë femra se sa meshkuj të vetmuar. Judy Kurianski, psikoloke, pohon: “Gjendja nuk është aq e mirë për femrat në kohën e sotme… Meshkujt nuk kanë aq nevojë të kallzohen, të tregojnë kualitet e tyre, sepse në qytet ka mjaft shumë femra që i duan… Shumica e njohjeve janë të shkurtëra, me fjalë të tjera lidhje sa për një natë… Femra e gjorë në atë rast i thotë vetes: Paj, as mbiemrin nuk ja di… Çfarë jam duke bërë…”.

Megjithatë, Judy Kurianski shton që edhe ndër meshkujt e Nju-Jorkut ka të tillë që i frikësohen bukurosheve të Nju-Jorkut. Kështu, ajo ka mbledhur rrëfime të djelmoshave të viteve të njëzeta të moshës të cilët përdorin viagrën, nga frika se mund të dështojnë me femrat e këtij qyteti të madh.

Katie Stewart thotë se edhe ajo ka dëgjuar për këto rrëfime. Sidoqoftë, ajo, sikurse shumë femra të tjera të Nju-Jorkut, ende shpreson se do të vijë “i vërteti” dhe se do të ketë fat në dashuri.

Sido që të jetë, Georgina Blau ka fituar mirë nga seria dhe turistët e interesuar për të parë Nju-Jorkun me “sytë e protagonistëve të Sex and the City”. Me paratë e fituara, ajo ka blerë një banesë modeste (37 metra katrorë) në Upper East Side, aty ku jeton Carrie, porse ende nuk ka para për të blerë këpucë “Manolo Blahnik” apo “Jimmy Choo”.