WBA NUK LEJON ZHVILLIMIN E DUELIT LUAN KRASNIQI – RUSLAN CHAGAEV

e mart 11.03.2008
World Boxing Asosiacion, apo WBA, nuk ka lejuar të zhvillohet dueli ndërmjet kampionit të botës në këtë version, Ruslan Chagaev kundër boksierit shqiptar Luan Krasniqi. Me këtë rast, Asociacioni i boksit botëror i ka dhënë një goditje boksierit shqiptar, i cili ishte shumë afër rastit për të sfiduar titullin e botës në njërin prej versioneve më të famshme të boksit botëror. Nga Asociacioni i boksit botëror thuhet se Chagaev nuk mund të ndeshet me Luan Krasniqin, ngase një revansh e ka merituar gjiganti Nikolai Valujev, pas fitores së shënuar javë më parë ndaj Sergej Lijachovichit. Chagaev, i cili nuk e ka pësuar asnjë humbje në karrierë, në prill të vitit të kaluar e kishte mposhtur Valujevin, për t’ia rrëmbyer titullin e kamponit në WBA. Tani mbetet të shihet nëse Luan Krasniqi do të sfidojë titullin e kampionit të Evropës, apo do shtrëngohet të niset drejt rrugës së gjatë me përfundim titulli i kampionit të botës.