Federer mposhti Samprasin

Tenisti më i mirë në botë, Roxher Federer ka shënuar fitore ndaj tenistit të njohur amerikan, Pit Sampras, me rezultat 2:1, në sete 6:3, 6:7, 7:6, në meçin ekzibicional që u zhvillua në "Madison Square Garden" para 19.000 tifozëve.
Ish-tenisti më i mirë i botës, Sampras, e djersiti mjaft shumë tenistin më të mirë për momentin. Kjo është fitorja e tretë e Federerit në katër ballafaqimet ekzibicionale ndaj Samprasit. Ndërkohë në kohën sa ishte Sampras ende aktiv, këta dy tenist janë përballur vetëm një herë dhe atë në 1/8 e finales së Uimbëldonit, kur atëherë 20-vjeçari Federer e mposhti tenistin amerikan që ishte mbrojtës i trofeut. "Ishte një ndjenjë e shkëlqyeshme të luash kundër Federerit. Ai është një lojtar dhe djalosh i shkëlqyeshëm. Fillimisht mendova se do të mund ta mposhtja, por më pas ai tregoi pse është tenisti numër 1 në botë. Ky është meçi im i parë që e humba në Nju Jork, por shpresoj se një meç të tillë do ta zhvillojmë edhe në vitin e ardhshëm", ka theksuar Sampras, fitues i pesëfishtë i US Openit.