Gjysma e njerëzve të botës posedojnë celularë?

Gati 26 vjet pas paraqitjes së rrjetës së parë mobile, numri i përgjithshëm i shfrytëzuesve të celularit ka arritur numrin mbresëlënës prej 3.3 miliardësh, që sipas të dhënave aktuale është gjysma e njerëzve të botës.

Sipas të dhënave të analistëve të kompanisë Informa, 2.571.563.279 njerëz në botë shfrytëzojnë rrjetën mobile GSM, derisa pjesa tjetër deri në 3.3 miliardë, që është numri aktual i shfrytëzuesve, shfrytëzon rrjetat CDMA dhe tjera.

Në të njëjtën kohë, nga Informa njoftojnë se, edhe pse sipas numrit të shfrytëzuesve duket që gjysma e njerëzve të botës posedojnë celularë, kjo në fakt nuk është krejt ashtu, duke marrë parasysh që penetrimi në disa vende është më i madh se 100 për qind. Në ato vende numri i madh i shfrytëzuesve posedojnë dy apo më shumë celularë.

Shtetet me penetrimin më të madh të celularëve për kokë banori janë Arabia Saudite, Suedia dhe Norvegjia, derisa rritja më e madhe e shfrytëzuesve shënohet në Kinë e Indi.

Sipas të dhënave të IPC (International Programs Center) të zyrës amerikane Census, popullata botërore numëron 6.635.077.187 njerëz.