Zhgënjim dashurie, vetëhelmohet 17-vjeçarja

Vajza ka gëlltitur 20 kokrra Atenolol. Mjekët:Gjendja e saj është e vështirë
ELBASAN-Një tjetër akt vetëflijimi për një zhgënjim në dashuri. Një 17-vjeçare ka tentuar t'i japë fund jetës duke konsumuar 20 kokrra Atenolol. Vajza me banim në lagjen "11 Nëntori" ka shkuar në farmaci dhe ka blerë tabletat, me të cilat kishte menduar t'i jepte fund jetës. E. D, 17-vjeç është gjetur nga familjarët e saj rreth orës 20. 30 të mbrëmjes pas konsumimit të tabletave dhe është transportuar për në spital. Sipas mjekëve, gjendja e saj është e rëndë për shkak të numrit të madh të tabletave."Po kryhen të gjitha trajtimet për ta nxjerrë nga gjendja e vështirë",- thonë mjekët, pa dhënë të tjera detaje rreth shëndetit të saj, apo për ndonjë përmirësim të mundshëm. Ende nuk dihen shkaqet që kanë çuar vajzën drejt aktit vetëvrasës.

Dyshohet se ajo ka pasur një zhgënjim dashurie dhe kjo i ka shkaktuar një gjendje depresive. Situatë që për vajzën, ndoshta edhe për shkak të moshës, ka qenë e papërballueshme, aq sa ajo vendosi si zgjidhje më të shpejtë vetëflijimin. Nuk është rasti i parë i vëtëhelmimeve që shkak kanë zhgënjimet apo problemet e ndryshme mes të dashurve. Ndërkohë që në shtim janë edhe rastet, kur për zënka të ndryshme në familje mes prindëve dhe fëmijëve, këta të fundit vendosin t'i japin fund jetës. Vetëm dy ditë më parë, një adoleshente nga Kuçova i dha fund jetës duke konsumuar fostoksinë.