Venger: Titulli është në duart tona

Arsen Venger vazhdon të besojë se Arsenali është pretendenti kryesor për të fituar titullin kampion, edhe pse ka barazuar 0 0 me Uiganin ditën e diel. Pasi e kanë eliminuar Milanin në mesjavë nga Liga e Kampioneve, nuk ka arritur të kalojë Uiganin në kampionat, edhe pse është një skuadër nga fundi i renditjes. Skuadra e Stiv Brusit arriti të marrë një pikë shumë të rëndësishme, që i jep mundësi t'i mbajnë ende shpresat. Ky ishte barazimi i tretë radhazi në kampionat për Arsenalin, i cili tashmë është vetëm dy pikë përpara Mançester Junajtidit në kampionat, edhe pse këta të fundit kanë një ndeshje mangut. Pas kësaj ndeshjeje Venger ka deklaruar: "Nuk dua t'i heq asgjë lojës së mirë të Uiganit, por fusha ishte vërtet shumë e keqe. Kjo gjë mund të konsiderohet si mungesë respekti ndaj tifozërisë, e cila paguan parà për të parë ndeshje. Ne ishim përgatitur për një ndeshje të vështirë, që do të luhej në një terren të vështirë, por gjithsesi i patëm mundësitë për të fituar. I vetmi ndryshim ishte se ata kishin një skuadër të fortë, si ndonjë skuadër regbie, e cila është mësuar të luajë në atë fushë. Gjithmonë unë kam thënë se fusha e "Olld Trafordit" nuk është ndër më të mirat, por e krahasuar me atë është e mrekullueshme." Ky ishte barazimi i tretë në kampionat, pasi më parë kishin barazuar me Birmingamin dhe Aston Vilën, megjithatë për trajnerin e Arsenalit, Arsen Venger, ata janë ende në luftë për titullin. Bëhet fjalë për një duel mes Mançester Junajtidit dhe Çelsit për titullin. "Lufta për titullin është bërë edhe më e vështirë, pasi ne kemi humbur edhe dy pikë të tjera. Megjithatë, ne do të vazhdojmë të qëndrojmë të qetë e të fokusuar në punën tonë, për të vazhduar drejt objektivit që kemi pasur që nga fillimi i këtij sezoni. Ndikon shumë në psikologjinë e lojtarëve kalimi nga "San Siro" tek Uigani. Ata luajtën shumë mirë dhe ne kemi pasur thuajse gjithmonë probleme me ta. Në një kohë kur ne nuk po arrinim të shënonim gol, Uigani filloi të besonte se mund të ishin ata që do të shënonin dhe do të merrnin ndonjë rezultat. Ne thjesht ishim disi më të lirshëm pas ndeshjes në "San Siro", ku arritëm të fitonim." Uigani ka arritur të marrë tri pikë dhe i largohet po me këtë diferencë zonës së ftohtë. Javën e ardhshme ata do të përballen me Boltonin, një përballje direkt për këtë zonë të renditjes. Që nga muaji nëntor e pas trajneri i tyre Brus ka këmbëngulur se skuadra është duke dalë nga vështirësitë. "Kur luajtëm përpara tre muajsh me Boltonin humbëm dhe mendova se nuk kishim më asgjë për të bërë. Por lojtarët arritën t'i kalonin vështirësitë. Skuadra tregoi karakter edhe në ndeshjen ndaj Arsenalit, por nuk arritëm të bënim asgjë më shumë," ka deklaruar trajneri i Uiganit, Stiv Brus.

Jens Lehman kritikon trajnerin

Jens Lehman nuk beson se Arsen Venger do ta mbajë ende në formacion, kur Manuel Almunia do të rikuperohet plotësisht. Që në fillim të këtij sezoni Lehman e ka humbur pozicionin e tij në formacion; më pas u dëmtuar dhe, si rrjedhojë, u konsolidua në formacionin e parë Almunia. Spanjolli është dëmtuar në janar të këtij viti dhe Lehman ka rifituar vendin në formacionin e parë, edhe pse kishte kohë që e kërkonte një gjë të tillë. Ndërkohë, Venger ka preferuar Almunian në ndeshjen ndaj Birmingamit, e cila përfundoi 2 2 dhe Lehman sërish u ul në pankinë. "Mendoja se trajneri do të merrte një vendim të drejtë, por nuk e bëri një gjë të tillë," ka thënë Lehman.

Fabregas: Nuk jam penduar për largimin nga Barça

Mesfushori i Arsenalit, Çesk Fabregas, vazhdon të këmbëngulë se nuk ka asnjë bregë që është larguar nga Barcelona, megjithatë nuk e përjashton mnundësinë për një rikthim të mundshëm të tij në "Kamp Nou" në të ardhmen. Fabregas e ka filluar karrierën e tij si futbollist te Barcelona me të rinjë, bashkë me Lionel Mesin dhe Xhovani dos Santosin, dhe u larguar nga skuadra spanjolle në moshën 16 vjeçare, në vitin 2004. Më pas ai u përmirësua ndjeshëm tek Arsneali, pas besimit të madh që i dha trajneri Arsen Venger. Ndërkohë, vitet e fundit ai ka pasur thuajse gjithmonë oferta nga Barcelona dhe nga Reali i Madridit. Në një intervistë që ka dhënë për një media spanjolle, Fabregas ka deklaruar se është i kënaqur me jetën që po bën tek Arsenali, dhe se nuk mund të kërkojë ndonjë trajner më të mirë se Arsen Vengeri. "Nuk e di nëse do të rikthehem ose jo. Ndihem shumë mirë këtu ku jam dhe po mësoj shumë nga filozofia e kësaj skuadre. Vengeri është një nga trajnerët më të mirë në botë; kaloj shumë kohë duke biseduar dhe duke punuar me të," ka përfunduar Fabregas.