Perrin: Eshtë shpejt për të festuar!

Trajneri i Lionit, Alen Perrin, këmbëngul se kampionati francez nuk është mbyllur ende, pavarësisht se skuadra e tij fitoi 4-2 ndaj Bordosë, duke u ngjitur gjashtë pikë përpara ndjekësve. Kanë mbetur edhe dhjetë ndeshje nga fundit dhe Lioni duket një hap larg titullit të shtatë radhazi, por Perrin i shmanget festës. Ai tha: "Jemi gjashtë pikë para. Këto gjashtë pikë i kemi marrë në ndeshjet e drejtpërdrejta me Bordonë, por asgjë nuk është e mbyllur. Nëse duam të festojmë titullin, duhet të fitojmë jashtë fushe. Kanë mbetur edhe shumë ndeshje për t'u luajtur dhe gjithçka mund të ndodhë". Fitorja erdhi në momentin e duhur për Lionin, që u eliminua nga Mançesteri në Ligën e Kampioneve. Perrin shtoi: "Skuadra dha përgjigjen që unë prisja. Unë e dija se futbollistët ishin të përqendruar, por u druhesha lodhjes dhe pasojave të eliminimit nga Championsi. Gjithsesi, ekipi e kuptoi rëndësinë e ndeshje dhe bëri atë që duhej të bënte. Në pjesën e dytë treguam se kemi kurajë dhe që dimë të vuajmë atëherë kur duhet".