Shtypi: Reali e ka mbyllur kampionatin

Shtypi spanjoll ka parashikur fundin e luftën për titull në Primer Divizion ditën e hënë, pasi Reali i Madridit është ngjitur tetë pikë mbi Barcelonës, pas rezultateve të javës së fundit. Reali përmbysi golin e disavantazhit dhe fitoi 2-1 ndaj Espanjolit ditën e shtunë, ndërsa Barcelona u mund 2-1 në fushën e saj, 24 orë më vonë. Në këto kushte, "merengesit" e kanë thelluar në tetë pikë avantazhin, i cili dy javë më parë ishte vetëm dy pikë. "Reali arratiset përsëri" ishte titulli i të përditshmes "Marca". Ndërkohë, gazeta katalanase "El Mundo Deportivo" mbante si titull kryesor "Pa Lionel Mesin nuk ka Barcelonë dhe nuk ka luftë për titull!". Presidenti i Barcelonës, Joan Laporta, e përshkroi humbjen ndaj Vilarealit si "shkatërrimtare". Të besuarit e tij iu dorëzuan golave të shënuar nga Markos Sena dhe Jon Dahl Tomason. Me këtë sukses Vilareli është ngjitur në vendin e tretë, vetëm katër pikë larg Barcelonës, kur mbeten edhe 11 ndeshje për t'u luajtur deri në fund të kampionatit. Reali e gjeti veten në disavantazh ndaj Espanjolit në "Bernabeu", por në fillim barazoi me Gonzalo Higuanin dhe më pas e fitoi ndeshjen me 11-metërshin e shndërruar në gol nga Raul Gonzales. Gjithsesi, ashtu si Barcelona, edhe "merengesit" dolën nga fusha të vërshëllyer nga tifozët vendas. "Nuk ishte ndonjë ndeshje për t'u mbajtur mend," tha trajneri i Realit, Bernd Shuster. Në një kohë kur dy skuadrat e kreut janë larg formës së tyre ideale, Santanderi, Getafe dhe sidomos Majorka kanë qenë ekipet që kanë kënaqur ndjekësit e futbollit në Spanjë. Santanderi, gjysmëfinalist në Kupën e Mbretit, është konfirmuar si surpriza e këtij sezonit, teksa ka arritur Atletikon e vendit të katërt, pas fitores 3-0 ndaj Betisit. Ata përfituan nga superioriteti numerik dhe synojnë për herë të parë pjesëmarrjen në Kupat e Europës. "Objektivi ynë në fillim të sezonit ishte të qëndronim në Primera Divizion. Me fitoren ndaj Betisit e arritëm matematikisht diçka të tillë. Tani mund të fillojmë të mendojmë për gjëra të tjera," tha trajneri Marselinjo. "Bukuria" tjetër e kësaj jave në Primera Divizon ka qenë Getafe, e cila vazhdon më tej edhe në Kupën UEFA dhe në Kupën e Mbretit. Modestët, e drejtuar nga Majkëll Laudrup, fituan 3-0 në fushën e Mursias, ku debutonte trajneri Havier Klemente. Në fund, por jo për nga rëndësia, vlen për t'u përmendur edhe fitorja 7-1 që Majorka arriti ndaj Rekreativos, duke ndalur një seri prej katër barazimesh radhazi. Sulmuesi venezuelian Arango shënoi tri gola në atë që ishte fitorja më e thellë për ishullorët në historinë e Primera Divizionit. "Ishte një ndeshje që çdo trajner e ëndërron. Gjithsesi, nuk ka ndryshuar asgjë në sezonit tonë. Janë vetëm tri pikë më shumë," tha trajneri i Majorkës, Gregorio Manzano.

Kalderon "voton" për Shusterin

Presidenti i Realit të Madridit, Ramon Kalderon, deklaroi se Bernd Shuster do të jetë trajneri i "merengesve" edhe në sezonin e ardhshëm, pavarësisht nga rezultati përfundimat i kampionatit spanjoll. "Nuk ka asnjë dyshim. Shuster do të qëndrojë me ne, edhe pse nuk e fitoi titullin kampion. E ardhmja e tij nuk varet nga rezultatet, por nga metodika e tij e punës, si dhe filozofia që ka për futbollin."

Frenk Rajkard: Gara vazhdon...

Barcelona është tetë pikë larg Realit të Madridit, pas humbje 2-1 të pësuar ndaj Vilarealit. Gjithsesi, trajneri holandez Frenk Rajkard nuk heq dorë nga titulli: "Për ne vazhdon gara në kampionat, ashtu si në Ligën e Kampioneve dhe në Kupën e Mbretit. Humbja me Vilarealin na i vështirëson gjërat, por gjithçka është ende e mundur".

Ronaldinjo, "jo" Çelsi dhe Milani

Ronaldinjo i ka përgënjeshtuar mundësinë e largimit nga Barcelona në fund të sezonit. Braziliani është kërkuar nga Çelsi dhe Milani, por pohon: "Unë po punoj që të rikthehem në 100% të formës dhe dua ta bëj diçka të tillë te Barcelona. Ndihem shumë mirë në këtë klub dhe në këtë qytet. Nuk ka asnjë arsye se përse duhet të largohem, dhe drejtuesit e dinë mirë diçka të tillë".