Kosova? Flasim pas anëtarësimit të saj në FIFA”

Nuk e kanë aspak të lehtë të flasin për të ardhmen e tyre dhe se me cilën kombëtare do të luajnë. Megjithatë, pas shpalljes së pavarësisë së Kosovës, që ka qenë edhe hapi më i madh i ndërmarrë ndonjëherë në historinë disa qindra vjeçare të këtij vendi, lojtarët kosovarë, që luajnë me përfaqësuesen shqiptare, nuk janë ndierë ndonjëherë kurrë më në dilemë se tani. Edhe pse nuk e tregojnë një gjë të tillë, të gjithë ata, pra Cana, Beqaj, Dallku, Curri, Berisha, Rrustemi, po e ndiejnë se atdheu i tyre, Kosova, ka nevojë për ta, në fushën e sportit. Megjithatë, ende nuk kanë vendosur se çfarë do të bëjnë. Në një bisedë telefonike, nga Ukraina, dy kosovarët, Armend Dallku dhe Debatik Curri, kanë pohuar se ata, për momentin nuk po e mendojnë ende një gjë të tillë. “Unë mendoj se është ende herët për të folur se çfarë do të bëjmë. Më përpara duhet që Kosova të anëtarësohet njëherë në FIFA dhe UEFA, e më pas të bisedojmë”, ka thënë Dallku. i të njëjtit mendim me të është edhe shoku i tij i ngushtë, njëkohësisht edhe lojtar i kombëtares shqiptare, Debatik Curri. “Unë mendoj ashtu si edhe Mendi”, ka thënë ai. “Ne duhet të mendojmë për eleminatoret e Botërorit 2010, dhe unë e kam thënë edhe më parë se do të qëndrojmë edhe në Botërorin 2010 me Shqipërinë dhe do të mundohemi të japim maksimumin për të arritur sa më lart”.

Gëzohen kur mësojnë se presidenti i FKF-së, Vokrri, ka qenë në Tiranë dhe ka folur me Dukën. “Na bëhet qejfi që punët po shkojnë mirë. Por, kur të vijë momenti i duhur, atëherë kur Kosova të pranohet në FIFA, ne, të gjithë kosovarët e kombëtares shqiptare, do të bisedojmë së bashku dhe do të zgjidhim gjithçka”, ka përfunduar dyshja “ukrainase”. Ndoshta do të qëndrojnë, ashtu siç tha edhe Vokrri, apo ndoshta do të largohen. Në çdo rast, presidenti i FSHF-së, Duka e ka thënë, “ata kanë të drejtë të vendosin si të duan. Ne nuk i ndalojmë”.
[ Add comment ] [ 1 comment ]