Ançeloti: S’ka më gabime!

Më në fund pak “dritë”... edhe për Milanin! Shumë mungesa, shumë dëmtime, kartona, lodhje fizike dhe atletike, por edhe situata të pafata. Kuqezinjtë kanë kaluar një “breshër” në Serinë A, pas eliminimit nga Champions League, por lajmet e mira kanë mbërritur dje, sidomos nga infermierira. Rikardo Kaka, Klarens Sedorf, Alesandro Nesta, Zeljko Kalaç (portieri australian, në stërvitjen e të hënës kishte pasur probleme) dhe Marek Jankulovski do të jenë në dispozicion të Karlo Ançelotit, për sfidën e sotme ndaj Sampdorias, në “San Siro”. Përballja me dorianët është e rëndësishme, ndoshta jetësore për kuqezinjtë, të cilët janë të thërritur në një mision tepër delikat, sepse “një barazim ose humbje do të ishte fatale në ndjekjen e vendit të katërt”, ashtu si thotë edhe trajneri i “Djallit”, i cili tha më pas: “Edhe pse mund të jemi të pafat, edhe pse mund të krijojmë shumë, edhe pse kundërshtari do të mbyllet në portën e tij, me 11 futbollistë, ne duhet të shënojmë, të fitojmë, të marrim tre pikët që na bëjnë punë. Nuk ka më kohë për gabime, për shpërqëndrime. Të mos harrojmë se Fiorentina është duke ecur shumë mirë dhe me të rinjtë dhe lojtarët vendimtarë që ka në skuadër, do të ketë vazhdimësi”, tha Karleto, i cili dëshiron më shumë sinjale pozitive, edhe pse sipas tij, bardheblutë janë një kundërshtar jo i lehtë, përkundrazi: “Ekipi i Maxarrit është i përbërë nga futbollistë cilësorë dhe ndaj janë të frikshëm. Edhe pse me mungesën e Kasanos vuan nga klasi dhe humb atë cilësi që e karakterizon, mbeten agresivë. Eshtë e vështirë të krijosh raste ndaj tyre, sepse dinë të mbrohen shumë mirë. Sigurisht, sinjalet që mora të shtunën, ndaj Romës, ishin ngushëlluese”. Në fund, Ançeloti foli edhe për çështjen Ibra dhe Mançini, duke dalë në mbrojtje të trajnerit zikaltër: “Unë parapëlqej, madje kërkoj që të ketë një shtrëngim dorë mes lojtarit dhe trajnerit, gjatë ndërrimit, sepse kështu po ekzagjerohet, ka humbur respekti për tjetrin dhe ata që shohin në televizor, fëmijët, por edhe njerëz që duan futbollit, pa harruar lojtarët e stolit, duhet të shohin një shembull të mirë. Të tilla reagime më mirë që të bëhen në dhomat e zhveshjes”.