INTER – JUVENTUS DHE FIORENTINA – LAZIO NDESHJET KRYESORE TË JAVËS SË 30-të NË SERIE A

Të gjitha ndeshjet e javës së 30-të të kampionatit italian Serie A do të zhvillohen të shtunën me fillim nga ora 15.00, përjashtuar supersfidën evropiane ndërmjet Inter-it dhe Juventus-it. Pas fitores së madhe kundër Romës, skuadra e Valon Behramit, ajo e Lazio-s do të zhvillojë edhe një ndeshje jashtëzakonisht të vështirë kundër Fiorentinës në "Artemio Franchi". Ndeshja e pjesës së parë të kampionatit i pat takuar Fiorentinës falë këtij gabimi të rëndë të portierit Ballotta. Por lazmo ka filluar të këndellet edhe pse në javët e fundit po paraqitet në mungesë të lojtarëve titullar si Luciano Zauri, Simone Del Nero, Fabio Firmani dhe Mobido Diakhitè, ndërsa mbrojtësi i krahut të majtë, rumuni Stefan Radu pritet të rikthehet pas lëndimit të lehtë që i pamundësoi derbin e parë romak. Violla do të bëjë çmos që të fitojë ndeshjen pas disfatës në mes javë nga Napoli në San Paolo 2:0 dhe në këtë mënyrë të përforcohet më tepër në vendin e katërt. Adrian Mutu i është rikthyer formës pas lëndimit që e mbajti dy javë jashtë terrenit, por nuk dihet se a do të paraqiten Martin Jorgensen, Alessandro Gamberini, Franco Semioli, Alberto Santana dhe Christian Vieri. Takimin Fiorentina-Lazio mund ta ndiqni direkt në Kohavision të shtunën me fillim nga ora 15.00, kur startojnë edhe këto sfida: Atalanta-Catania, Palermo-Genoa, Reggina-Napoli, Roma-Empoli, Sampdoria-Cagliari, Siena-Parma, Torino-Milano dhe Udinese-Livorno. Ndeshja kryesore dhe një ndër supersfidat e këtij edicioni do të zhvillohet në stadiumin Giuzzeppe Meazza ndërmjet kampinit dhe liderit aktual Inter që pret Juventus-in e famshëm. Ballafaqimi i pjesës së parë të kampionatit pati përfunduar pa fitues në Olimpiko të Torinos me rezultat përfundimtar 1:1. Cruz pat shënuar për neroaxurët, ndërsa Camoranesi kishte barazuar rezultatin pas inkuadrimit nga banka rezervë. Inter dhe Juventus janë takuar tri herë këtë stinor, ndërsa bjankonerët nuk kanë fituar ende. Dy herë ndeshjet përfunduan baras,një fitore i takoi Inter-it në kuadër të Kupës së Italisë. Për spektaklin e së shtunës në radhët e Inter-it rikthehet nga suspendimi qendërmbrojtësi Marko Materazzi, i cili do të ketë punë me David Trezeguen të cilin Ranieri e pushoi në Kasteljani kundër Empolit. Por në atë ndeshje e cila përfundoi pa gola u pa edhe një herë që Vincenco Iaquinta nuk është lojtar që kryen punë kur starton prej minutës së parë. David Trezegue e ka kohën të tejkalojë krizën pasi që nuk ka realizuar gol në tetë ndeshjet e fundit kampionale. Super duelin Inter-Juventus mund ta ndiqni direkt në Kohavision të shtunën me fillim nga ora 20.30 minuta.