Panuçi me kokë, Roma nuk fal

Pas humbjes në derbi, Roma ka “rindezur motorrët”, duke fituar 2�1, ndaj Empolit të Malezanit, që është paraqitur shkëlqyeshëm në “Olimpico”, duke befasuar djemtë e Spaletit. Për miqtë shumë raste të krijuara, por edhe një gol i bukur i shënuar nga Xhovinko. Verdhekuqtë, pasi në 30 minutat e para kanë vuajtur, duke mos arritur të kalojnë mbrojtjen e vendosur mirë nga toskanët, kanë gjetur rrugën e rrjetës me një bashkëpunim mes Totit dhe Tonetos: kapiteni ka dhuruar një magji, duke pasuar me thembër për mbrojtësin, i cili nuk ka falur përpara portës. Asgjë më shumë për 45 minutat e para, ndërsa pas pushimit reagimi empolez ka ardhur menjëherë, me Xhovinkon, i cili ka barazuar llogaritë. Disa minuta më pas Perrota, për një faull nga prapa, është ndëshkuar me karton të kuq, dhe vendasve u është dashur të sakrifikojnë dhe të vrapojnë shumë për të gjetur avantazhin, i cili ka ardhur me “heroin” Panuçi, i cili me një goditje me kokë ka mposhtur Basin. Me këtë trepikësh të rëndësishëm, kryeqytetasit janë ngjitur në kuotën e 64 pikëve, ndërsa trajneri Spaleti ka festuar pankinën e tij të 400�të në Lgën profesioniste.





Spaleti: S’ka fitore pa vuajtje

Eshtë i kënaqur për fitoren e arritur dje ndaj Empolit, Luçiano Spaleti, trajneri i Romës, i cili në intervistën e pasndeshjes tha: “Pasi humbëm derbin me Lacion ishte normale që të ishim pak të nervozuar dhe psikologjikisht jo mirë, ndaj dhe vuajtëm. Më vjen mirë që tifozët na kanë ndihmuar me mbështetjen e tyre. Empoli luan shumë mirë dhe mbrohet me kujdes, duke sulmuar me kundërsulm, ashtu si edhe u pa gjatë takimit, por fakti që ishim në inferioritet numerik na bëri që të vraponim shumë dhe lodhja u ndje, por për fat të mirë goli erdhi atëherë kur ishte momenti dhe na dha frymëmarrje. Kartoni i kuq i Perrotës? Disi i ekzagjeruar, por s’dua të komentoj vendimet e gjyqtarëve, ndaj po e mbyll me kaq”.