Xhila krijon, por vendos Pato

Milani risheh “dritën” dhe rilind nga “rrënojat” e dy humbjeve të pësuara radhazi, ndaj Romës dhe Sampdorias. Por, suksesi i arritur në “Olimpico” të Torinos, ndaj “demave” është tepër i vuajtur, sidomos për paraqitjen e mirë të ekipit të Novelinos, por sidomos për shpërdorimin e shumë rasteve përpara portës kundërshtare. Lajmi i mirë i tre pikëve të arritura ndaj granatave është shoqëruar me një lajm të hidhur, atë të fitores së Fiorentinës ndaj Lacios, sepse diferenca mbetet e pandryshuar tashmë me vjollcët, të cilët vazhdojnë të jenë +4 pikë përpara kuqezinjve. Për “Djallin” vendos një gol i Patos, në pjesën e dytë, edhe pse aksioni mban “firmën” e Alberto Xhilardinos, që pasi kalon portierin, pason për brazilianin, i cili e shtyn topin në rrjetë. Për kronikën, Sedorf godet traversën, disa minuta përpara golit, ndërsa vetë Xhilardino dhe Pato nuk finalizojnë, në dy raste të mira përpara portierit Fontana. Për Toron, për t’u nënvizuar paraqitja e Stelones, i cili provon të “thumbojë” mbrojtjen e mirëorganizuar nga Maldini, Nesta, Kaladze dhe Odo, por që këtë herë nuk “fut ujë”, kjo edhe si pasojë e një pritje vendimtare të Kalaçit, përballë Stelones.



Pato: Goli? Jo i bukur, por i rëndësishëm

Eshtë në “qiellin e shtatë” Aleksandre Pato, për golin e shënuar ndaj Torinos, që i dha fitoren kuqezinjve. Braziliani është ngjitur në kuotën e 7 “perlave” në kampionat: “Realizova një gol jo të bukur, por të rëndësishëm, sepse kjo i dha mundësinë ekipit që të merrte tre pikët. Luajtëm një ndeshje të bukur, përballë një skuadre që nuk u dorëzua deri në fund dhe që ishte e vendosur që të mos humbiste brenda fushës. Por, arritëm të sulmonim dhe krijuam presion deri sa gjetëm avantazhin. Falenderoj Xhilardinon, i cili më dha një top të shkëlqyer dhe unë vetëm sa e shtyva në rrjetë. Si në pjesën e parë, ashtu edhe në të dytën, zbritëm në fushë të vendosur dhe fitorja erdhi si pasojë e shpirtit dhe karakterit. Tani duhet të vazhdojmë ndjekjen e vendit të katërt”.



Ançeloti: Një Milan i mirë, por që duhet të mos ndalet

Ndjekja e vendit të katërt vazhdon. Misioni duket i vështirë, por jo edhe aq shumë përKarlo Ançelotin, trajnerin kuqezi, i cili pas ndeshjes me Torinon, u shpreh: “Zhvilluam një takim të bukur. E nisëm shumë ngadalë ndeshjen, por më pas e rritëm ritmin dhe u përmirësuam. Lëvizëm me shumë ekuilibër. Eshtë një fitore e rëndësishme, sepse qëndrojmë në binarët e duhur. Por, duhet të shtoj se edhe gabuam disa herë përpara portës kundërshtare, me Xhilardinon, Sedorfin dhe Paton. Në fund ishte normale që të vuanim disi, sepse kundërshtari u hodh në përpara, ndërsa ne ishim në tension, pasi na duheshin me çdo kusht tre pikët. Tani, të shohim përpara. Fiorentina fitoi, ndaj distanca ka mbetur e palëvizur. E kam thënë gjithmonë se gjithçka është në dorën tonë”. Ançeloti është shprehur edhe për paraqitjen e Xhilardinos: “Alberto ishte i zoti dhe e ka mbajtur mirë topin, sidomos atëherë kur ishte e nevojshme, por nuk ishte i saktë në të dy rastet që kishte. E ardhmja e tij? Për ne mund të qëndrojë te Milani, edhe vitin e ardhshëm. Më pas, do të varet gjithçka nga ai, nga vullneti për të luftuar për një vend. Pato? Eshtë një sulmues i cili lëviz shumë dhe ndryshon pozicion gjatë ndeshjes. Në këtë moment preferon më shumë të niset nga larg, që të ketë hapësirë në veprime dhe i pëlqen që të ketë një sulmues pykë përpara. Nuk i njeh ende mbrojtjet italiane dhe i duhet kohë për t’u ambjentuar, por po më mëson nga java në javë dhe do të rritet”.



Xhilardino: Sakrifikoj për ekipin

“U përpoqa të jap maksimumin, edhe pse në disa situata isha i pafat dhe gabova. Mundohem gjithmonë që të jap kontributin”



Eshtë një Alberto Xhilardino i qeshur ai që flet për takimin ndaj Torinos: “Ishte një sukses i merituar, për nga ajo që dhamë në fushë dhe për nga paraqitja e përgjithshme e skuadrës. Më vjen shumë mirë që goli erdhi pikërisht në një moment të vështirë dhe nga këmbët e mia. Pato? U tregua i zoti që i besoi atij aksioni, por jam i kënaqur për atë që dhashë në fushë, sepse ndihesha mirë fizikisht dhe psikologjikisht. Kisha edhe një rast mjaft të mirë për të shënuar, por nuk arrita, sepse ndoshta u vonova pak në veprimet e mia”, tha sulmuesi kuqezi, që më pas është ndalur te hipotezat e largimit të tij, duke i përgënjeshtruar: “Nuk është e vërtetë, këtu te Milani ndihem shumë mirë dhe sakrifikoj për këtë ekip, sepse ka shumë kampionë që më konkurrojnë”.



Sedorf i kënaqur: Reaguam me shpirt

“Ata që na kritikojnë i kanë harruar sukseset që kemi arritur. Fituam Botërorin e Klubeve para 3 muajsh: të tjerët ku ishin?”



Klarens Sedorf nuk e fsheh krenarinë e tij pas fitores së Milanit ndaj Torinos dhe nuk e cilëson si negativ dhe në hije sezonin e kuqezinjve: “Dua të përsëris që përpara tre muajsh ishim ekipi më konkurrues nga të gjithë. Por, ka nga ata, të cilët tani na kritikojnë, që harrojnë shumë shpejt për disa arritje tonat. Fituam Botërorin e Klubeve në dhjetor: të tjerët ku ishin?”, tha mesfushori holandez, që më pas shtoi: “Reagimi ishte i rëndësishëm dhe i menjëhershëm, pas humbjes ndaj Sampdorias. Por, ajo që më jep më shumë optimizëm është fakti që pashë në fushë shpirtin që na ka karakterizuar gjatë gjithë këtyre viteve, në të cilat kemi fituar shumë trofej. Kemi karakter të fortë dhe jemi të vendosur që të arrijmë vendin e katërt në renditje. Tani na pret një javë pune dhe përgatitje, për ndeshjen që do të kemi me Atalantën, në “San