Lëkundet vendi i Rajkardit!

Nëse na duhet të analizojmë situatën e trajnerit Frenk Rajkard në pankinën e Barcelonës, ndeshja përballë Valencias e tregon fare qartë atë. Deri të enjten përpara ndeshjes në “Mestalla”, pozicioni i teknikut holandez ishte i sigurtë, sepse kishte besimin e drejtuesve të klubit. Pavarësisht kritikave, drejtuesit e Barcelonës kanë dhënë besimin e tyre të plotë për teknikun holandez dhe i kanë dhënë detyrën për të drejtuar skuadrën deri në fund. Por, eliminimi nga Valencia në Kupën e Spanjës e ka lëkundur shumë pozicionin e teknikut Rajkard, i cili tashmë nuk është më i sigurtë në drejtimin e Barcelonës. Gjërat nuk po shkojnë shumë mirë për skuadrën katalanase, e cila në kampionat ka tre ndeshje që nuk fiton dhe ndodhet shtatë pikë prapa Realit të Madridit. Tashmë, për Barcelonën kanë mbetur dy tituj për t’u fituar: kampionati, i cili duket shumë i vështirë dhe Champions League. “Nuk më shkon ndërmend të mos fitojmë asnjë titull këtë sezon”, ka qenë deklarata e presidentit të Barcelonës, Hoan Laportas, i cili e ka të qartë se nëse skuadra katalanase dështon si sezonin e kaluar, atëherë Rajkard do të jetë i larguari i parë nga Barcelona. Për sa i përket eliminimit në Kupën e Spanjës, fajin e kanë lojtarët dhe trajneri, edhe pse Rajkard e ka marë vetë përsipër dështimin e pësuar. Por, edhe ky veprim i Rajkardit nuk e ka shpëtuar atë nga “shënjestra” e drejtuesve të Barcelonës, të cilët tshmë duket se i kanë kthyer shpinën, duke humbur besimin te tekniku holandez. Më formën e treguar në ndeshjet e fundit, Barcelona ka humbur shumë, duke shfaqur edhe një lojë jo bindëse. Eliminimi në Kupë i ka dhënë një goditje shumë të rëndë lojtarëve katalanas, të cilët shpresojmë të reagojnë në takimin e sotëm në kampionat, përballë Valadolidit në “Camp Nou”. Tani, sytë e drejtuesve të Barcelonës janë nga kampionati dhe Champions League, dy objektivat e mbetur të Barcelonës për këtë sezon. Nëse katalanasit nuk arrijnë të fitojnë të paktën njërin prej këtyre dy titujve, atëherë Frenk Rajkard do ta ketë shumë të vështirë të qëndrojë në pankinën e skuadrës katalanase sezonin e ardhshëm. Nëse Rajkard do të largohet, atëherë alternativat për ta zëvendësuar atë janë të shumta. Bëhet fjalë për portugezin Hoze Murinjo, i cili edhe më parë ka shprehur dëshirën e tij për të drejtuar pankinën e Barcelonës. Por ish�tekniku i Çelsit nuk është e vetmja alternativë sepse në garë janë edhe emra si Mikael Laudrup (aktualisht trajner i Getafes) dhe Pepe Guardiola, ish�lojtar i Barcelonës.