Edmondi, potencial për kompaninë më profitabile

Intervistë me prof. dr. Edmond Hajrizin, kandidat për drejtor të përgjithshëm në PTK Hajrizi
vlerëson kundërkandidatët e tij, por thotë se Bordi ka shumë arsye për
të votuar për atë. Ai ka një varg thirrjesh akademike brenda dhe jashtë
vendit. Sipas tij, PTK-ja shihet si njëra prej zgjidhjeve më të mira
për punësim në Kosovë, por edhe ata që janë dhe vijnë në PTK duhet të
jenë më të mirët. Kush është Edmond Hajrizi? Mbron
doktoratën në Vienna University of Technology në sistemet menaxhuese,
ndërsa po në këtë universitet specializohet edhe më tej në post-
doktoraturë në inxhiniering dhe menaxhment, me përqendrim në menaxhimin
e sistemeve komplekse, menaxhim strategjik, proceseve, operativ etj.
Ndërsa, studimet në magjistraturë i ka përqendruar në teknologjinë e
avancuar të automatizimit, mekatronikës etj. Ka qenë drejtues i disa
programeve studimore dhe specialistike në Vjenë dhe disa kompani
austriake të teknologjisë së lartë, Siemensit, WI-FI Vienna, Management
College, menaxher
projektesh të ndryshme, ligjërues në Universitetin e Prishtinës,
ligjërues dhe rektor në UBT, anëtar i Bordit të PTK-së etj. Hasan Saliu Prishtinë, 10 janar - Ka
bërë një sërë specializimesh dhe studimesh edhe pas doktoraturës në
Vjenë, duke qenë edhe bartës i shumë projekteve menaxhuese dhe të
teknologjisë së lartë. Në Prishtinë ka themeluar dhe drejton
Universitetin për Biznes dhe Teknologji, është anëtar i Bordit të
Drejtorëve të PTK-së, por tani kërkon që të arriturat e tij
profesionale dhe shkencore t'i aplikojë në PTK. Edmond Hajrizi thotë se
ka për qëllim ta marrë drejtimin e Postës dhe Telekomit të Kosovës me
qëllim që, siç shprehet ai, gjithkush në Kosovë të krenohet me sukseset
e kësaj kompanie publike. Në intervistën për “Lajm” ai jep përgjigje
edhe në pyetjen se përse vlerësuesit duhet të votojnë për të. “Lajm”: Si e vlerësoni zhvillimin e deritanishëm të garës? Hajrizi: Gara është duke rrjedhur mirë, shumë mirë. “Lajm”: Në PTK thuhet se duhet ndryshuar shumëçka. Po e nisim nga telefonia fikse. Kemi rrjet më pak të shtrirë në rajon. Hajrizi: Po,
është fakt se këtu ka hapësirë për të bërë shumë e shumë punë. Unë
personalisht mendoj se telefonia fikse është njëra prej anëve shumë të
forta (potencialeve) që ka PTK-ja dhe ne duhet ta shfrytëzojmë këtë
patjetër. “Lajm”: Kemi dy kode ndërkombëtare, në telefoni fikse dhe mobile. Kur do zgjidhet kjo? Hajrizi: Kjo është më shume çështje që lidhet edhe me statusin e Kosovës. Besoje se edhe kjo çështje do te zgjidhjet shume shpejt. “Lajm”: “Vala” me çmimet më të shtrenjta në rajon, duket si operatori më i keq. Çfarë duhet përmirësuar? Hajrizi: Unë nuk mendoj se “Vala” është operatori me i keq. Unë po ashtu nuk
mendoj se çmimet e “Valës” janë më të shtrenjta në rajon. Po investojmë
shumë që “Vala” të ketë një infrastrukturë moderne dhe një mundësi për
të qenë sa me afër klientit edhe me çmime më te ulëta. Por, natyrisht
se sot kjo nuk mund të jetë e mjaftueshme dhe duhet bërë ndryshime dhe
zhvillime të shumta në mënyrë që çdo gjë të harmonizohet dhe të
funksionoje asisoj që ky operator publik kosovar të jetë shumë i aftë
për t'u bërë ballë sfidave të tregut dhe teknologjisë së lartë. “Lajm”: Çfarë duhet ndryshuar konkretisht? Hajrizi: Gjithkund
në Kosovë, por edhe në PTK, ka shumë potencial për ndryshime pozitive
të vazhdueshme, cilësore, por edhe në disa raste për re-engineering.
Dhe unë po besoj pikërisht këtu do te jetë detyra ime kryesore si
profesionist. Ndryshimet pozitive duhet te shihen menjëherë. “Lajm”: PTK-ja me rreth 2500 punëtorë, shpesh shihet si zgjidhje më e mirë për punësim... Hajrizi: Po,
është e vërtetë që PTK-ja shihet si njëra prej zgjidhjeve më të mira
për punësim në Kosovë. Unë mendoj se dhe dëshiroj që edhe me tutje
PTK-ja të konsiderohet ndërmarrja me zgjidhjen më te mirë për punësim,
por edhe ata që janë dhe vijnë në PTK do të jenë më te mirët.Sa
më përket mua, ju e dini se unë jam i punësuar... Por, si drejtor në
PTK dua të jap kontributin tim profesional dhe menaxhues që e kam
arritur në specializimet dhe përvojat e shumta në universitetet
prestigjioze evropiane. “Lajm”: Ka pasur kritika për transparencën financiare në PTK. Si do ta ndryshoni gjendjen? Hajrizi: Menaxhimi
i financave, kontabiliteti dhe auditimi, janë fusha që kërkojnë pa
mëdyshje zhvillim dhe nivel të lartë profesional jo vetëm ne PTK. Këtu
kemi mungesë të madhe të kuadrit në Kosove dhe në këtë drejtim duhet
patjetër te ndërmerren hapa për përsosjen e kuadrove, përmirësimin e
proceseve dhe në këtë mënyrë mund të kemi dhe duhet të kemi
transparencë më të mire, jo vetëm për publik, por edhe për mundësinë e
vendimmarrjeve profesionale të bazuara në fakte dhe rezultate... “Lajm”: Telekomi është i vetmi operator i paprivatizuar në rajon dhe më gjerë. Si duhet bërë kjo, sa për qind duhet privatizuar? Hajrizi: Bazuar
në trendet e zhvillimit dhe ndërtimit te operatorëve në Evropë dhe
rajon, privatizimi shihet si alternativa më interesante me të cilën
shteti ka mundësi të ketë beneficione, të ketë investime nga jashtë,
por edhe cilësia e shërbimeve mund të rritet. Kjo varet shumë nga
politikat e shtetit të Kosovës se si do të jetë vizioni dhe strategjia
e tyre në këtë drejtim. Por, është shumë me rëndësi të vendoset në atë
mënyrë që të përfitojnë të gjithë: qytetarët e Kosovës,
Qeveria dhe bashkëpunëtorët e PTK-së. Në bazë të këtij përfitimi dhe
vlerave që posedon PTK-ja, duhet marrë vendim se a duhet privatizuar
dhe sa për qind duhet privatizuar. Kjo është një çështje shumë
profesionale dhe ne po punojmë në këtë drejtim. “Lajm”: Përse duhet të fitoni ju, përse duhet t’ju zgjedhin juve? Hajrizi: Kam
edukim superior në shumë disiplina të cilat lidhen direkt me proceset e
PTK-së, përvoja të suksesshme ndërkombëtare dhe vendore në menaxhim
modern dhe teknologji të larte, aftësi për udhëheqje dhe ndërmarrësi,
ekspert i fushave të ndryshme, njohës i mirë i zhvillimeve në PTK vite
me radhe; konsulent dhe ekspert ndërkombëtar për biznes, teknologji dhe
edukim, bartës i shume programeve dhe projekteve për transferin
ndërkombëtar të dijeve dhe teknologjive në Kosove; themelues dhe rektor
i Universitetit për Biznes dhe Teknologji, profesor në shume programe
studimesh të organizuara nga universitete me renome botërore për
menaxhment etj.