Runi: E kam zili Xherardin!

Uejn Runi rrëfeu se fitorja e Champions League të vitit 2005 nga ana e Liverpulit e motivon edhe më shumë për të përsëritur këtë sukses me Mançester Junaitedin. Runi njihet si tifoz i “vjetër” i Evertonit, pasi edhe ka luajtur me skuadrën tjetër të Liverpulit, dhe ka pranuar se e ka pasur të vështirë të “gëlltiste” ngritjen e trofeun nga ana e Xherardit, pasi e kishte udhëhequr skuadrën në përmbysjen e paharrueshme ndaj Milanit. “E kisha të vështirë të shihja se si Stiven Xherard ngrite kupën. E pata shumë zili. E di që ishte gjë e mirë për futbollin anglez, sikurse është fakti që ka katër skuadra angleze në çerekfinale. Por kam qenë tifoz i Evertonit që fëmijë dhe sigurisht nuk isha shumë i kënaqur kur Liverpuli fitoi”, tha ai. Runi shtoi se një nga arsyet pse zgjodhi Junaitedin për të vazhduar karrierën ka qenë pikërisht mundësia për të përsëritur atë fitore të Liverpulit. Skuadra e tij duket e sigurt drejt gjysmëfinales, pasi pret sot Romën në Mançester me avantazhin e dy golave nga ndeshja e parë, por Runi thekson se kampionati mbetet prioriteti i skuadrës së tij. “Fitimi i trofeve si kampionati apo Champions ishte arsyeja pse zgjodha Mançesterin”, shtoi ai. “Kampionatin e fitova vjet dhe do të ishte fantastike sikur të fitonim në Europë këtë herë. Junaitedi duhet ta kishte fituar më shumë këtë titull, por shpresoj që të gjithë të japim ndihmën tonë që numri i trofeve europianë të shtohet”.