Benitez: Tani na pret Moska

Rafael Benitezi e pret me padurim gjysmëfinalen e tretë përballë Çelsit, në katër sezonet e fundit dhe është e qartë përse. Në dy gjysmëfinalet e para ishte Liverpuli ai që kaloi në finalen e Champions dhe trajneri i “të kuqve” mendon se fitorja 4�2 ndaj Arenalit në çerekfinale ishte një tjetër konfirmim i forcës së skuadrës së tij në Europë. Liverpuli, i cili ka mbërritur deri në gjysmëfinale pasi kaloi pengesat e Interit dhe Arsenalit do të presë në “Anfield” Çelsin në 22 prill, ndërsa kthimi do të luhet në “Stamford Bridge” në 30 prill. Benitezi ka besim që skuadra e tij do të jetë e pranishme në finalen e 21 majit në Moskë. Trajneri spanjoll deklaroi: “Eshtë me të vërtetë një rastësi e çuditshme që do të luajmë përsëri ndaj Çelsit. Duket se sa herë kualifikohemi në gjysmëfinale do të luajmë ndaj tyre, por është e qartë që do të jetë një ndeshje shumë shumë e vështirë”.

Liverpuli mundi Çelsin në gjysmëfinalet e vitit 2005 me rezultat të përgjithshëm 1�0. Më pas, “të kuqtë” fituan titullin në Stamboll pas një suksesi dramatik me Milanin. Të dy skuadrat u përballën edhe në gjysmëfinalet e vitit të shkuar, me Liverpulin që kaloi në finalen e Athinës pas suksesit në serinë e 11�metërshave. Tani “blutë” shndërrohen përsëri në pengesën e fundit përpara finales, por në ndryshim nga dy sezonet e mëparshme, ndeshja e kthimit do të luhet në “Stamford Bridge”. Benitezi thotë: “A do të jetë ky një avantazh për Çelsin? Nuk e di. Këto do të jenë dy ndeshje shumë të dyluftura dhe të barabarta, prandaj mund t’iu them vetëm pas ndeshjes nëse diçka e tillë do të jetë një problem”.

Për Liverpulin, gjysmëfinalja e sotme është e nënta në historinë e saj të Champions League dhe e 15�a në total në të gjitha kompeticionet europiane. Ndërsa fitorja me Arsenalin erdhi në ndeshjen e tretë ndaj londinezëve brenda një jave, me dy të tjerat që përfunduan në barazime 1�1. Diabi kaloi në avantazh “topçinjtë” në të 13', por Sami Hipia barazoi me kokë. Fernando Torres kaloi në avantazh “të kuqtë” gjatë pjesës së dytë, por Adebajor u përgjigj me një gol që u duk se do të kualifikonte Arsenalin. Megjithatë, të kuqtë shënuan edhe dy gola të tjerë deri në fund, me Xherardin nga penalltia dhe Babelin në kohën shtesë. Benitezi shtoi: “Gjëja që më befasoi më shumë ishte vetbesimi i lojtarëve të mi, sidomos gjatë pjesës së dytë. Pjesa e parë nuk ishte shumë e mirë, por pas intervalit e rritëm ritmin në mënyrë të dukshme. Ishte një ndeshje e jashtëzakonshme për tifozët tanë, u shënuan gjashtë gola në total dhe skuadra luajti jashtëzakonisht mirë. Dëgjova të thuhej se kjo ishte një ndeshje e dobët nga Xherardi, por unë jam shumë i kënaqur me të. Shënoi një penallti në një moment përcaktues dhe janë të paktë lojtarët që marrin përgjegjësinë në një moment të tillë. Mendoj se edhe ndeshja e tij ishte pozivite. Tani do të luajmë me Çelsin në gjysmëfinale dhe do të jetë jashtëzakonisht e vështirë, pasi ata janë një skuadër e jashtëzakonshme. Megjithatë, me cilësinë dhe përvojën e treguar ndaj Arsenalit jam i sigurt që mund t’ia dalim mbanë. Kur Arsenali barazoi në 2�2, lojtarët e mi treguan një karakter të jashtëzakonshëm dhe barazuan një ndeshje atëherë kur dukeshim të eliminuar”.