Milan?Inter “luftë” për Dinjon!

Ka filluar një derbi milanez apasionant, i cili nuk po luhet në fushën e lojës, por në merkaton e futbollistëve. Bëhet fjalë për blerjen e Ronaldinjos, për të cilin Milan dhe Interi janë në “luftë” për të marrë shërbimet e lojtarit brazilian. Pas skuadrës kuqezi, tashmë janë edhe zikaltrit të cilët janë hedhur në sulm dhe po bëjnë gati planin e tyre për të arritur një marrëveshje me Barcelonën. Dje, e përditshmja italiane “La Gazzetta dello Sport”, konfirmoi bisedën midis Marko Brankas, drejtor teknik i Interit dheRoberto de Asis, vëllai dhe menaxheri i Ronaldinjos. Kjo gazetë konfirmon gjithashtu interesimin serioz të Interit për të blerë Ronaldinjon këtë verë, edhe pse do t’i duhet të mundin konkurencën e fortë të “kushurinjve” kuqezi. Lëvizja e parë që mendohet të bëjë Interi është rinovimi i kontratës me firmës e veshjeve sportive “Nike”. Kjo firmë është sponsori kryesor i Ronaldinjos dhe për këtë arsye, drejtuesit zikaltër kanë menduar se kjo do të ishte lëvizja e parë. “Nike”, është shumë afër rinovimit të kontratës me Interin. Dje, administratori i deleguar i Interit, Ernesto Paolilo, konfirmoi se klubi zikaltër duhet të tregoher shumë i kujdesshëm në merkato. “Jemi në një periudhë ku varemi shumë nga merkato, por vendimet do të merren në fund. Ronaldinjo? Jemi në gatishmëri, por nuk kemi filluar asnjë bisedim”. Interi është lideri i Serisë A, me katër pikë përpara Romës dhe po ecën i sigurt drejt titullit të tretë radhazi. Megjithatë, edhe në kampin e Milanit janë të bindur se Ronaldinjo do të veshë fanellën e kampionëve të Europës në fuqi dhe këtë e ka bërë të ditur presidenti i kuqezinjve, Silvio Berluskoni. “Nëse Ronaldinjo largohet nga Barcelona, atëherë e vetmja skuadër që mund të marrë shërbimet e tij është Milani”. Por, kjo deklaratë e padronit të kuqezinjve është hedhur poshtë nga e përditshmja “Tuttosport”, e cila konfirmonte se presidenti i Barcelonës, Hoan Laporta, i ka dhënë më shumë prioritet Interit dhe pikërisht Masimo Moratit në blerjen e Ronaldinjos. Pavarësisht kontratës që ekziston midis Interit dhe firmës “Nike”, në anën tjetër, Milani ka vazhduar kontaktet me Roberto de Asis, i cili ka darkuar në Romë me Adriano Galianin. Por, gjithçka mbetet në dorën e Barcelonës, e cila pret të marrë oferta më të mira nga dy klubet milaneze. Tashmë është bërë e ditur se Milani ka ofruar 20 milionë euro për Ronaldinjon, por oferta e fundit e Interit ka qenë ajo e 25 milionë eurove. Për momentin, zikaltrit janë më të avantzhuar, edhe pse në fund do të vendosë dëshira e vetë lojtarit. Ronaldinjo është ai që vendos, por për momentin nuk është konfirmuar asgjë. Madje, ditët e fundit është shfaqur edhe një pistë tjetër, ajo e Mançester Sitit, klub i cili drejtohet nga tajlandezi Taksin Shinauatra, i cili është i gatshëm të bëjë “çmendurinë” për të sjellë në Mançester yllin brazilian.