Adebajor: Do të priten kokë!

Sulmuesi i Arsenalit, Emanuel Adebajor, pret që Arsen Vengeri të bëjë disa ndryshime gjatë merkatos së verës. Topçinjtë kanë pasur shumë probleme javët e fundit, duke rrëshkitur nga gara për titull në Premiership dhe duke u eliminuar nga Liverpuli në çerekfinalet e Chanpions League të martën. Dhe kapitulli i Arsenalit ka ardhur, sipas shumë kritikëve, për shkak të dobësisë së stolit në skuadër. Dhe Adebajor është plotësisht i përgatitur që Venger, që nuk njihet për shpenzimet e mëdha në merkato, të bëjë ndryshime në dritaren e ardhshme të tregut futbollistik. “Në fund të sezonit në çdo klub ka shumë ndryshime, dhe e njëjta gjë do të ndodhë edhe te ne”, tha ai për “The Sun”. “Por i takon trajnerit të vendosë kush do të rrijë dhe kush do të largohet nga klubi. Unë po kënaqem këtu dhe shumë lojtarë të tjerë po ashtu. Por duhet të ruajmë përqendrimin deri në fund të sezonit. Sivjet kemi mësuar shumë gjëra. Humbjet janë të dhimbshme dhe shpresojmë që të mësojmë diçka edhe nga ajo ndaj Liverpulit. Por tani duhet ta kthejmë vëmendjen nga Mançester Junaitedi (nesër), pasi do të jetë një tjetër takim i madh për ne”.

Gallas: Na mungon përvoja!

Ndërsa kapiteni Uilliams Gallas e ka vënë gishtin te mungesa e eksperiencës, për të shpjeguar humbjen me Liverpilin, pasi ajo penallti e minutave të fundit nuk duhet të ishte lejuar. “Ne na mungoi eksperienca. Nuk mund të lejosh një penallti 30 sekonda pasi ke barazuar. Tani do të jetë e vështirë të rinkthehemi, pasi morali është në nivele shumë të ulta”, tha francezi. “Askush nuk priste kaq shumë nga ne në fillim të sezonit, por kur ke shkuar kaq larg ndihesh keq kur dështon, ndaj nuk kemi si të qeshim e të gëzohemi”.