Lehman: Unë mund ta kisha shpëtuar ekipin!

Jens Lehman pretendon se mund ta kishte evituar eliminimin e Arsenalit nga Champions League nëse do t’i ishte dhënë shansi. Portieri 38�vjeçar shprehu zemërimin e tij për uljen në pankinë, duke sulmuar trajnerin Arsen Venger dhe njeriun që po e mban larg portës së Topçinjve, Manuel Almunia, në një intervistë me “Kicker”. “Unë qëndrova në Londër për të fituar Champions League dhe pashë shanse të mira për të luajtur, por nuk m’u dhanë këto shanse, ndaj jam shumë i mërzitur”, tha ai. Numri 1 i Gjermanisë u la në stol, nga ku pa ëndrrën e tij europiane të shuhej pas humbjes 4�2 me Liverpulin në çerekfinalen e dytë. “Për mua personalisht, është një tragjedi, aq më tepër që nuk pata një shans për ta parandaluar këtë humbje”, tha ai. “Kam pasur mendime të tilla që kur trajneri nuk më aktivizoi më pas barazimit 0�0 me Milanin”. Lehman refuzoi shansin për të shkuar te Borusia Dortmund në dimër, duke pretenduar se do të luftonte për të rifituar vendin e titullarit te Arsenali. Por kështu, ai mund të ketë kompromentuar shanset për të qenë titullar i Gjermanisë në Euro 2008, dhe Lehman nuk arrin ta besojë se ky “bast” nuk doli i fituar, pasi Almunia është ende titullar. “Të ulesh në pankinë ndaj një portieri që nisi të luante vetëm kur u bë 30 vjeç nuk është një gjë e këndshme”, shtoi Lehman. “Jam shumë i zemëruar”. Për më tepër, Lehman mendon se është trajtuar keq nga Vengeri, duke pretenduar se nuk i është dhënë një shans i drejtë. Jens përfundoi: “Nëse trajneri do të kishte biseduar me mua para fillimit të sezonit do të kisha vendosur më kollaj çfarë doja, ose më saktë nëse doja të qëndroja në pankinë. Megjithatë ai nuk merr mendimin e askujt në zgjedhjet që bën, ndaj situata e tillë është. Shpresoj që me Gjermaninë të shkëlqej në Euro 2008, dhe pse e di që trajneri i Arsenalit as nuk do ta verë re fare paraqitjen time”.