Ronaldinjo: Dua vetëm Milanin!

“Ronaldinjo shumë pranë Milanit”. Ky është titulli që të gjithë mediat italiane dhe spanjolle janë gdhirë në ditët e djeshme. Një lajm që ka tërhequr vëmendjen në botën e futbollit botërorë. Menaxheri i Ronaldinjos, Roberto de Asis, administratori i deleguar i Milanit, Adriano Galiani dhe Ernesto Bronxeti janë takuar të mërkurën së bashku për të biseduar për të ardhmen e yllit brazilian. Të tre kanë darkuar në 22:30 në një restorant të Milanos dhe kanë biseduar gjatë për kalimin e brazilianit te Milani. Në ditët e fundit është folur shumë për këtë çështje, por duket se të dyja palët kanë gjetur gjuhën e përbashkët dhe Ronaldinjo është shumë pranë kalimit te Milani. Kët e ka konfirmuar edhe vëllai i tij, i cili ka rrëfyer: “Nëse largohemi nga Barcelona, atëherë destinacioni jonë i vetëm është Milani”. Këto kanë qenë fjalët e De Asis, i cili ka mbushur me shumë optimimizëm të gjithë kampin kuqezi. Milani i ka ofruar drejtuesve të Barcelonës plot 30 milionë euro për kartonin e Ronaldinjos, por ende drejtuesit katalanas nuk kanë dhënë një përgjigje në lidhje më këtë ofertë. Por, vetë Ronaldinjo ka shprehur më parë dëshirën e tij për të veshur fanellën e skuadrës kuqezi. Ka qenë pikërisht në ndeshjen midis Milanit dhe Barcelonës në “San Siro”, në miqësoren e zhvilluar përpara tre vjetësh për lamtumirën e Demetrio Albertinit. Atëherë Ronaldinjo shprehej: “Të luash në “San Siro” është diçka shumë e bukur. Eshtë një stadium magjik dhe publiku shumë i mrekullueshëm. Shpresoj të kthehem një ditë”. Dhe kjo ditë duket se po afron. Kanë mbetur edhe pak ndeshje këtë sezon dhe misteri për të ardhmen e brazilianit është shumë afër për t’u zbuluar. Hera e fundit që Ronaldinjo ka qenë i pranishëm në “San Siro” ka qenë 18 prilli i vitit 2006, kur Barcelona përballej me Milanin në gjysmëfinalen e Champions League, trofe të cilin katalanasit e fituan duke mundur Arsenalin në finale. Në atë ndeshje, Ronaldinjo ishte në formë të shkëlqyer dhe ishte ideusi i fitores së arritur në Milano, pas një goli të shënuar nga francezi Ludovik Zhyli. Por, duket se ato kohë të bukura të brazilianit janë shumë larg. Aktualisht, Ronaldinjo është i dëmtuar dhe ka më shumë se një muaj që nuk luan një ndeshje me fanellën e Barcelonës. Pikërisht nga kjo, kanë dalë zërat për largimin e brazilianit nga “Camp Nou”, zëra të cilat duket se janë shumë afër realizimit. Për momentin nuk ka asgjë zyrtare në lidhje me këtë marrëveshje, megjithatë në orët në vazhdim pritet që të zyrtarizohet gjithçka. “Nuk duhet të nxitohemi, por gjërat janë në bisedim e sipër. Ronaldinjo është i impresionuar nga Milani dhe dëshira e tij është të veshë fanellën e kësaj skadre. Në vazhdim do të bisedojmë edhe më shumë dhe ndoshta mund të vendoset gjithçka se çfarë do të bëhet”, përfundoi De Asis.